Il conern da l'interprendider Samih Sawiris, ha pudì augmentar sia svieuta per 43% sin passa 155 milliuns francs. Quai ils emprims sis mais da quest onn. Orascom scriva però vinavant cifras cotschnas cun 176 milliuns francs. L'onn passà eran quai 18,9 milliuns.
Tut ils segments èn creschids.
Sco quai ch'il concern cun sedia ad Altdorf communitgescha, sajan ins creschì en tut ils segments. Il segment hotel è creschì per 24% sin 73,3 milliuns francs. Tar las immobiglias ha Orascom schizunt pudì crescher per 91% sin 58,1 milliuns. Quai oravant tut pervi d'in augment en tuttas regiuns.
Il segment «Town Management» nua ch'ils servetschs e las activitads che vegnan purschidas en las differentas destinaziuns vegnan resguardads haja fatg or prest 16 milliuns tar la svieuta. Quai correspunda a prest in terz.
Reducir daivets en il focus
Tut en tut scriva Orascom ch'els sajan sin il dretg curs cun lur strategia. Davart perspectivas per il rest da l'onn n'ha Orascom betg fatg indicaziuns. En il focus stettia vinavant la restructuraziun e da reducir ils daivets.
RR novitads 10:00