Concret sto il SECO dar ora infurmaziuns davart exports da l’onn 2014. In schurnalist da la gasetta emnila WOZ ha vulì savair, tge firmas cun sedia en Svizra ch’han dumandà là ina lubientscha da pudair exportar material da guerra.
Il SECO n’ha betg vulì dar quellas infurmaziuns al schurnalist. Il secretariat è stà da l’avis, che mo la cumissiun da controlla federala haja il dretg da vesair detagls davart l’export da material da guerra. Vinavant han els fatg attent sin motivs da politica da segirezza.
Nagins interess periclitads
Tenor la decisiun dal Tribunal federal na sajan ils interess da la Svizra dentant betg periclitads cun questas infurmaziuns. Vinavant ha il Tribunal fatg attent sin la rolla da las medias. Ellas hajan l’incumbensa da rapportar sch’ils organs da controlla statals funcziunan.
RR novitads 14:00
