Il 2017 eran 13 da 100 persunas independentas. Quai correspunda ad ina quota da 12,8%. Avant 20 onns muntava la quota anc a prest 15%, communitgescha l'Uffizi federal da statistica. En l'Uniun europeica è la cumpart levamain pli auta, dentant er pli bassa che avant 20 onns.
En media èn persunas independentas radund 10 onns pli veglias che persunas emploiadas. Facturs che decleran quest fatg èn l'experientscha da lavur, l'agen chapital sco er la veglia da cuntinuar a lavurar er suenter la vegliadetgna da pensiun.
Differenzas tranter independents ed independentas
En general lavuran bler dapli umens che dunnas independentamain. Er impiegar persunal fan surtut ils umens che lavuran sur sasez. Dunnas che lavuran independentamain, lavuran savens davent da chasa e sulettas.
Plinavant èn Svizzers e Svizras pli savens independents che persunas da l'exteriur. Er decisiv per lavurar sur sasez è la scolaziun. Persunas cun ina scolaziun terziara lavuran en proporziun tar las ulteriuras persunas pli savens sin agen quint.
Independents fan pli pauc vacanzas
Las relaziuns da lavur tar ils independents sa differenzieschan sin divers livels. Uschia lavuran persunas cun atgna fatschenta dapli uras l'emna, lavuran supplementar las fins d'emna e fan pli pauc vacanzas che impiegads. En general èn persunas independentas però cuntentas cun lur situaziun. Mo paucs midassan pli gugent en ina relaziun da lavur sco impiegà.
Tar il tema segirezza sociala sa mussa, che in quart da tut ils independents n'ha nagina cassa da pensiun e na paja er betg contribuziuns en la terza pitga.
RR novitads 11:00