Siglir tar il cuntegn

Header

video
Padel è trendy e simpel, ed ina maschaida dal squash e dal tennis
Or da Telesguard dals 19.06.2023.
laschar ir. Durada: 3 minutas 10 Secundas.
cuntegn

Dar padel In sport da trend sa derasa en Svizra

Era en il Grischun duai dar dapli plazzas per giugar padel. Tge è la fascinaziun e per tgi è il sport en la chabgia transparenta?

En l’America dal sid u en la Spagna è padel gia etablì e vegn giugà da milliuns da giugadras e giugaders. En Svizra è il sport pir en la fasa d'introducziun. Malgrà che l'emprima plazza da padel è vegnida fabritgada gia dal 2010 è il sport pir vegnì popular ils ultims pèr onns.

audio
Padel: ina visita a Bogn Ragaz per guardar quest nov sport
ord Actualitad dals 04.05.2023. Maletg: Keystone
laschar ir. Durada: 3 minutas 32 Secundas.
audio
Padel: Roger Lang davart il nov sport da trend
ord Actualitad dals 04.05.2023. Maletg: RTR
laschar ir. Durada: 3 minutas 52 Secundas.

Ina furma ibrida

Il sport vesa ora sco sche tennis e squash avessan gì in uffant. Giugà vegn sin ina plazza sumeglianta al tennis, ch'è dentant pli pitschna. La plazza è però circumdada d’ina paraid transparenta da mintga vart da la rait, sumegliant sco tar il squash.

Jau hai gì passa in’ura per chapir co integrar la paraid en il gieu
Autur: Roger Lang manader Big Point Tennis Bad Ragaz
Ein Spielplatz für Padel
Legenda: Ina da duas plazzas da padel a Bogn Ragaz La construcziun sumeglia ad ina chabgia. Las paraids èn per part da plexiglas e per part da saiv da giatter. La plazza e mobila e po era vegnir spustada. RTR

Sco tar il tennis vegn giugà vi e nà sur la rait e sco tar il squash dastgan ins era integrar la paraid en il gieu. Las ballas vesan sin l’emprima vista or sco quellas da tennis, èn dentant levamain pli pitschnas e pli levas. La palutta percunter è tut autra sco il Rachet ch’ins enconuscha dal tennis.

A senester ina palutta da tennis a dretga ina palutta da padel
Legenda: A sanestra ina palutta da tennis a dretga ina palutta da padel RTR

La palutta da padel e be circa mez uschè gronda sco quella da tennis. Enstagl da cordas datti ina surfatscha da material sintetic, savens carbon, ch’è plain foras per che l’aria possia passar cun giugar. A la fin dal tegn datti in’anza da segirtad per la chanvella.

In sport per tuttas e tuts

Giugaders da squash han avantatgs cun integrar la paraid en il gieu fertant che giugadras da tennis èn en avantatg cun il gieu a la rait, per exempel tar ballas giugadas directamain or da l’aria. Sin lur custs vegnan dentant era persunas senz’experienza en in da quels sports.

Padel è damain tecnic e bler pli simpel d’entschaiver cumpareglià cun tennis
Autur: Roger Lang trenader da tennis Big Point Tennis Bad Ragaz

Pervi ch’ins gioga padel adina en in dubel e grazia a las paraids resta la balla tar in passadi en media pli ditg en il gieu. Plinavant vegn il service fatg da sutensi. Il sport è pia pli simpel era per giugadras e giugaders pli attempads.

Dapli plazzas era en il Grischun

En Svizra datti passa 100 plazzas da padel. En il Grischun datti fin ussa be ina plazza a San Murezzan. Ulteriuras plazzas a Domat ed a Cuira èn però en planisaziun. Ed era a Bogn Ragaz datti la pussaivladad da giugar ina partida en la chabgia transparenta.

RTR actualitad 07:00

Artitgels legids il pli savens

Scrollar a sanestra Scrollar a dretga