Umens omosexuals na pon vinavant betg dar sang sch'els han gì sex cun umens entaifer l'ultim onn. Il cussegl dals chantuns ha vuschà cun 22 cunter 17 vuschs da refusar ina moziun da la BDP. La moziun saja vegnida inoltrada en in temp, cura che umens omosexuals na pudevan insumma betg dar sang. Quai na saja uss betg pli il cas, ha argumentà Konrad Graber da la PCD da Lucerna.
Dapi il fanadur da quest onn dastgan umens omosexuals dar sang, sch'els han ils ultims 12 mais betg gì relaziuns sexualas cun umens. Decisiv saja il sa cuntegnair da ristg e betg l'orientaziun sexuala. Era las dumondas che vegnan fatgas avant il dar sang na sajan betg discriminantas, ha declerà Graber.
Umens en partenadis registrads na pon betg dar sang
Crititgà vegn surtut che er umens en in partenadi registrà na pon betg dar sang. Quai era sch'els sa chattan en ina relaziun stabila. Per Liliane Maury Pasquier da la PS da Genevra na possian ins tar umens en relaziuns stabilas betg discurrer dad in sa cuntegnair da risico. Da quest avis è er Claude Janiak da la PS da Basilea-Champagna che viva sez en in partenadi registrà.
Il Cussegl federal era s'exprimì cunter la moziun. Tenor il minister da sanadad Alain Berset sustegna il cussegl dentant da schluccar la pratica, entant che la segirtad dals retschaviders è garantida.
RR novitads 12:00