Datas da mesiraziun d’ovra atomara Leibstadt restan secretas

L’ovra atomara Leibstadt SA (KKL) na sto betg publitgar las datas davart las emissiuns radioactivas sur il chamin d’aria duvrada. Il Tribunal administrativ federal ha approvà il recurs da la gestiunaria da l'ovra atomara cunter la disposiziun da l'Inspecturat federal per la segirezza nucleara ENSI

La tur da sfradentar da l'ovra atomara Leibstadt davos in'auta saiv. Bild in Lightbox öffnen.

Legenda da maletgs: Las datas restan secretas: L'ovra atomara Leibstadt na sto betg publitgar las datas davart l'aria duvrada. Keystone

L'Inspecturat federal per la segirezza nucleara ENSI aveva decretà che la Leibstadt SA stoppia publitgar questas datas. Il Tribunal administrativ federal ha argumentà sia decisiun ch'i saja ina ponderaziun dals interess. L'interess public da publitgar las datas saja pli pitschen che l'interess da mantegnair il secret.

Interess public n'è betg predominant

Perquai na dettia quai nagin interess public predominant. I sa tractia da datas che hajan – sche insumma – ina forza expressiva restrenschida cura che l’ovra en il chantun Argovia funcziuneschia normal.

Concret sa tracta quai da datas dal temp tranter il prim da schaner 2013 ed il prim da november 2014. I va per datas d’aria persa dal chamin da l’ovra atomara Leibstadt. Questa uschenumnadas datas da EMI cuntegnan indicaziuns davart gas nobels, erosols e jod tar manaschi normal sco er davart gas nobels en cas d’in disturbi.

Datas brisantas sco ristg

Il Tribunal administrativ federal ha accentuà en sia decisiun da 35 paginas che las KKL sajan adina pli u main fitg en il focus da la critica d’organisaziuns u da partidas che n’approvian betg l’energia atomara.

Las datas da EMI na sajan bain betg datas persunalas fitg sensiblas. Tuttina dettia quai ina tscherta brisanza – numnadamain pervi da la natira da las datas, ma betg pervi dal cuntegn. Tenor la dretgira pudessan questas datas en cas da publicaziun vegnir duvradas cunter l’ovra atomara.

RR novitads 12:00