Sco tut noss possess vala era per noss relasch digital in dretg d'ierta. Quai vul dir: tut quai che resta enavos va ad ils ertavels e las ertavlas. Sch'ins vul avair la controlla davart tut quai che capita cun il relasch, lura fai senn da gia s'occupar cun quel ad uras. Per las datas digitalas munta quai: adina puspè stizzar quai ch'ins na dovra betg e sa decider tge che duai capitar cun il relasch e tgi che duai s'occupar da quel.
Tips per reglar las atgnas datas
- Planisar ad uras tge far cun tut las datas ch'ins lascha enavos.
- Avair la survista e stizzar tut quai ch'ins na dovra betg.
- Crear ina glista cun tut las datas d'access e tegnair en salv quella en in lieu segir.
- Infurmar las persunas che duajan surpigliar il relasch u perfin nudar quai en il testament.
- S'infurmar tge pussaivladads ch'i dat tar ils accounts. Tut tenor pon ins gia nudar là tgi che duai avair ils dretgs sin las datas u cura ch'il account duai vegnir stizzà.
Era sch'ina persuna defuncta n'ha betg reglà tge che duai capitar cun ses relasch, datti pussibilitads da pudair reglar il relasch digital:
Tips per ertavels ed ertavlas
- Far ina survista davart tut las activitads en la rait da la persuna defuncta – nua datti accounts u abunaments?
- Sche quai n'è betg pussaivel chattan ins bler entras l'account dad e-mail. Per survegnir access a lez pon ins cumprovar la mort cun in attest da mort u in contract d'ierta.
- Tschertgar abunaments online ed applicaziuns che custan e disdir il contract.
- Stizzar là nua ch'igl è pussibel ils contos.