La planta haja blessà uschè grev la mamma da 42 onns e ses figl da 6 onns, che las duas persunas sajan anc mortas al lieu da la disgrazia. Quai communitgescha la Polizia chantunala dal Son Gagl. Las circumstanzas exactas da la disgrazia n'èn anc betg enconuschentas.
La via da spassegiar è bain frequentada, dis che blera glieud è da viadi pon quai esser pliras tschient persunas. Suenter la disgrazia ha la polizia serrà tut las sendas da viandar en il conturn. La davosa controlla da la via da spassegiar è succedida il venderdi suentermezdi, quai succeda trais giadas l’emna.
Esser pertschart dal ristg
En il Grischun èn las vischnancas responsablas per la rait da sendas da viandar e spassegiar, uschia Stephan Kaufmann il mainafatschenta da l'uniun da sendas da viandar Grischuna. Quant savens che las sendas vegnan controlladas dependia dentant da bler facturs. Ina senda greppusa vegnia segiramain controllada pli savens ch'ina che maina sur in prà.
Ina buna preparaziun avant ch'ir a viandar saja impurtant. Tut tenor nua ch'ins giaja saja il dretg equipament ed er in sguard sin la previsiun da l'aura fitg impurtant. I valia adina er atgna responsabladad.
I dat adina in ristg restant e sch'i capita insatge è quai extrem tragic, ma ins na po betg sclauder quai.
La finala dettia mai ina segirtad absoluta, i possia adina capitar insatge, la finala sajan ins en la natira durant viandar ni spassegiar e là dettia adina ristgs restants.