Siglir tar il cuntegn
Inhalt

Svizra Datti oz in pass envers pajas egualas per umens e dunnas?

Laschar analisar las pajas dad in post extern, quai vul il Cussegl federal. Uschia vul el analisar, nua che dunnas gudognan pli pauc che umens per la medema lavur. Actualmain datti ina discriminaziun da paja tranter um e dunna da passa 7% che na sa lascha betg declerar.

Legende: Audio Bunura: Lescha d'egualitad per garantir egualitad da paja abspielen. Laufzeit 03:18 Minuten.
03:18 min, Actualitad dals 29.05.2018.

In post extern duai analisar mintga 4 onns las pajas da firmas che han dapli che 50 collavuraturas e collavuraturs, quai pretenda il Cussegl federal. La cumissiun dal Cussegl dals chantuns percunter vul analisar las pajas tar firmas cun dapli che 100 collavuraturas e collavuraturs.

Memia paucas dunnas profitassan

Per Kathrin Bertschy, la co-presidenta da la federaziun da tetg da dunnas Alliance F, profitass cun questas mesiras ina memia pitschna part da las dunnas. Cun analisar las pajas da firmas cun passa 100 collavuraturs, vegnissan mo 45% da tut las persunas emploiadas analisadas. Cun la proposta dal Cussegl federal fissan quai 54% da tut ils emploiads.

Insumma nagina aderenta dad in tal sistem n'è la responsabla per il dossier tar l’Uniun svizra da las patrunas e dals patruns, Daniella Lützelschwab. Las interpresas fetschian gia pli che avunda per garantir pajas egualas per la medema lavur, di ella. Ins duaja meglier sustegnair las firmas cun lur agens sistems da controlla.

En media anc adina 600 francs pli pauc

Dentant argumentescha Kathrin Bertschy che sistems da controlla sin basa voluntaria n'hajan fin oz betg purtà egualitad. Dunnas gudognian anc adina per la medema lavur en media 600 francs pli pauc che umens. Perquai dovria in post extern, uschia la co presidenta dad Allaince F.

Daniella Lützelschwab da l’Uniun da patrunas e patruns vul dentant schliar il problem sin autra via. Las cundiziuns per las dunnas duajan vegnir megliuradas per coordinar famiglia e lavur, di ella. Ella spetgia, che er quellas mesiras vegnian discutadas oz en il Cussegl dals chantuns. Entant spera Kathrin Bertschy, ch'i vegnia fatg in pass enavant en il cumbat cunter la discriminaziun da pajas tranter umens e dunnas – sco igl è garantì gia dapi il 1981 en la constituziun.

RR actualitad 07:00