Sco reacziun sin il debachel da la Credit Suisse vul la Finma, la Surveglianza federala dals martgads da finanzas, dapli pussanza.
Sco autras impurtantas surveglianzas vul era la Finma pudair dar en l'avegnir chastis pecuniars sche bancas han fatg sbagls. Quai communitgescha la surveglianza, sin basa d'in rapport che tracta il naufragi da la CS.
Vitiers vul la Finma ch'i saja pli cler tge persunas dals gremis directivs che sajan responsablas. Ella crititgescha la suprastanza da la Credit Suisse ch'è stada responsabla per la strategia da la banca.
La strategia saja stada la raschun che la banca ha fatg naufragi. Pervia da reorganisaziuns, auts custs, perditas e multas haja la banca adina stuì prender si dapli chapital nov. Il management da ristgas manglus haja giugà ina gronda rolla tar tut ils problems da la Credit Suisse.
La Finma di dentant era che las acziunarias ed ils acziunaris gronds n'hajan betg nizzegià lur pussaivladads d'influenzar tar bunificaziuns. En il rapport propona la Finma era d'adattar las prescripziuns da «too big to fail» per bancas.
