Uschia vegn il bigliet dals uffants directamain chargià sin il Swisspass. Per uffants e giuvenils che hajan gia uschia in Swisspass saja quella midada pratica, di Thomas Ammann, il pledader da medias d'Alliance Swisspass, envers SRF. Uschia sajan tut ils bigliets en il medem lieu.
Bleras chartas en la bursa
Pli cumplitgà poi dentant vegnir tar ils uffants pli giuvens. Enfin quà ha la persuna creschida - la mamma, il tat u la madritscha - gì il bigliet da palpiri da l'uffant en l'atgna bursa. Uss dentant – cunzunt sch'ins è da viadi cun plirs uffants – poi esser stentus d'avair tut lur cartas en l'atgna bursa.
Il Swisspass sin il telefonin
Per ils creschids che vulan evitar ina bursa plain cartas, datti la pussaivladad da chargiar l'agen bigliet ed ils bigliets dals uffants sin il telefonin. Uschia pon ins agiuntar il Swisspass da l'uffant en la app, di Thomas Ammann. Damai che l'uffant dovra per quai dentant in'atgna adressa da mail sajan els vidlonder da chattar ina meglra soluziun. Uschia duai ins a partir da l'avrigl – sumegliant a l'applicaziun dal certificat da corona – pudair agiuntar a moda simpla il bigliet dals uffants sin l'agen telefonin.