Siglir tar il cuntegn

Header

Purtret dad Ermotti.
Legenda: Sergio Ermotti, il CEO da la banca gronda UBS dat giu la fin dal mais ses post. Keystone
cuntegn

Davos quartal cun Ermotti UBS ha dublegià gudogn

  • La UBS ha fatg en il terz quartal in gudogn da 2,1 milliardas dollars americans. Quai correspunda al dubel da l'onn passà.
  • Avant pajar taglia ha l'UBS fatg in gudogn da 2,6 milliardas cumpareglià cun 1,4 milliardas durant la medema perioda da l'onn passà.
  • Raschun principala per il gudogn saja il gudogn da fatschenta pli aut e la vendita da la plattafurma per vender fonds, Clearstream.

Uschia ha la UBS gudagnà massivamain dapli durant il terz quartal che l'onn avant, communitgescha la banca. Er las spetgas dal martga e as stimaziuns dad analists èn uschia vegnidas surpassadas cleramain.

La vendita da la plattafurma Clearstream a la bursa tudestga ha purtà a l'UBS in gudogn net da 600 milliuns dollars. Ma er la vendita dad immobiglias a Genevra han influenzà a moda positiva il resultat.

Collavuraturs survegnan ina paja da l'emna supplementara

La banca gronda sa mussa generusa envers ses collavuraturs e sias collavuraturas, pervi da la crisa da corona. Sco segn da stima per il grond engaschi en quest onn plitost grev, duain collavuraturas e collavuraturs senza funcziun da cader survegnir ina paja da l'emna supplementara. Quai custa la banca gronda radund 30 milliuns dollars.

L'ultima giada cun Sergio Ermotti

Quest quartal è l'ultim sut la direcziun dal CEO Sergio Ermotti, che dat giu ses post la fin da quest mais. Il Neerlandais Ralph Hamers surpiglia questa lavur. Ermotti è stà cuntent en vista a la buna situaziun. El saja losch da las contribuziuns che ses collavuraturs prestian mintga di, en spezial durant quests temps grevs.

Ulteriur svilup è malsegir

Il management da la banca è precaut cura ch'i va per il svilup. Ils cas da Covid-19 che creschan puspè dapi in temp chaschunan ulteriura malsegirezza e pudessan impedir la buna via. Er las tensiuns geopoliticas che s'augmentian pudessan impedir l'augment. Cun questa situaziun saja perquai cumplettamain avert co la situaziun sa sviluppa vinavant, scriva la banca. Da far ina prognosa saja perquai fitg grev.

RTR novitads 10:00

Artitgels legids il pli savens

Scrollar a sanestra Scrollar a dretga