Ina giada dapli pretenda la regenza da Donald Trump dapli dazis. Per la Svizra munta quai dapi l'emna passada dazis en media dazis da 12,5% – avant eran quai anc 10%. Ils pajais da l'Uniun europeica, pia era noss pajais vischins, profiteschan percunter da dazis pli bass da 10%. Quai pudess esser in disavantatg per interpresas svizras en la fatschenta d'export – ed uschia era per firmas en il Grischun.
En cumparegliaziun cun noss pajais vischins, ils gronds concurrents en l'Europa: Quels han 2,5 % pli paucs dazis. E la finala, cura ch'ins fa il quint, è quai ina tscherta malgistadad e sin il martgà han ins lura in pau dapli difficultads che avant.
Ins stoppia dentant resguardar ch'i na valia betg automaticamain per l'entira Svizra da nov simplamain 12,5% dazis. Quai dependia mintgamai dal product d'export – sche quai saja per exempel ina maschina u medicaments. E tut tenor situaziun vegnian tscherts dazis er cumulads. Uschia ch'ins stoppia guardar da product tar product, sco il directur da l'Uniun grischuna d'artisanadi e mastergn Maurus Blumenthal di. Quant fitg che l'economia grischuna sentia la finala ils novs dazis, vegn a sa mussar ils proxims meins.
Tenor el saja dentant la sfida la pli gronda per las interpresas en Svizra la malsegirtad. Fin cura valan quests dazis ussa? Quant auts vegnan els ad esser en in pèr emnas u en in mez onn? Quella mancanza da segirtad per planisar a lunga vista fatschentia bleras interpresas.
