Siglir tar il cuntegn

Header

audio
Saira: Cussegl federal vul stritgar dazis sin products industrials
Or da Novitads dals 27.11.2019.
laschar ir. Durada: 03:21 minutas.
cuntegn

Dazis sin imports Mesira cunter insla da pretschs auts

Il Cussegl federal ha decidì la mesemna dad abolir tut ils dazis sin products industrials. Ils custs muntan a 500 milliuns francs. Sco il Cussegl federal scriva, sa tractia dad ina mesira cunter l'insla da pretschs auts, la Svizra.

Per ils impressaris svizzers munta quai, ch'els profiteschan da prestaziuns preliminaras pli favuraivlas e pon uschia sezs sbassar ils custs da producziun. Tenor il Cussegl federal vegnan uschia las relaziuns commerzialas pli effizientas e la concurrenza rinforzada.

Consuments duain profitar

Profitar duain er ils consuments, sch'ils dazis d'import sin products sco autos, velos, cosmetica, apparats da tegnairchasa, stgarpas e textilias scrodan. Per garantir ch'ils gudogns vegnan er propi dats vinavant als consuments, vul il Cussegl federal instradar in monitoring.

Ils ultims onns aveva la Confederaziun mintgamai incassà en media 500 milliuns francs per dazis sin products industrials. Il Cussegl federal spetga che questas perditas vegnan parzialmain cumpensadas cun pli autas activitads commerzialas ed entradas da taglia supplementaras. Ils effects positivs da l'entira economia stima il Cussegl federal sin 860 milliuns francs.

Il project va uss en il parlament. Dat quel il consentiment, lura duain ils dazis scrudar sin l'entschatta dal 2022.

RTR novitads 15:00