Dapli schlantsch duai per exempel dar cun schluccar la protecziun da las auas ed en tscherts cas duai dar in obligatori d'indrizs solars vi da bajetgs. La votaziun generala davart la lescha per in provediment segir da forza electrica cun agid d'energias regenerablas è lura stada, cun 104 cunter 54 vuschs, e 33 abstenziuns. Sco proxim sa fatschenta il Cussegl dals chantuns cun la materia.
Parlament di Gea a 15 projects d'ovras idraulicas
Sco il Cussegl dals chantuns, vul er il Cussegl naziunal rinforzar la segirezza dal provediment d'energia l'enviern. En il center stattan la realisaziun da 15 projects per ovras idraulicas ch'èn vegnidas priorisadas durant ina maisa radunda. Fin il 2040 vul il parlament uschia rinforzar l'energia regenerabla cun 6 uras terawatt.
Per ch'ils projects possian vegnir realisads tant pli spert, duain las proceduras vegnir acceleradas. Sco gia la Chombra pitschna ha er la Chombra gronda decis unanimamain da stgaffir ina basa legala. Da nov duain ils gestiunaris d'ovras idraulicas vegnir obligads da sa participar vi da las reservas d'energia.
Cussegl naziunal è cunter obligatori da solar
Il Cussegl naziunal na vul savair nagut dad in obligatori da solar per bajetgs existents pli gronds. In tal obligatori duai be dar per bajetgs novs e per bajetgs existents che vegnan renovads. Surtut tar sanaziuns da tetgs.
La Chombra gronda na suonda cun quai betg la proposta da sia cumissiun. Quella vuleva ir anc pli lunsch, cun proponer d'equipar bajetgs existents pli gronds cun panels solars. Quai en spezial sch'il tetg vegn renovà. La Chombra gronda ha approvà ina moziun en quest senn da Jacqueline de Quattro (PLD/VD). Quai cun 159 vuschs Gea, 32 Na ed ina abstenziun.
La cumissiun per ambient, planisaziun dal territori ed energia dal Cussegl naziunal ha vulì ir pli lunsch. Ella ha vulì far obligatoric che bajetgs pli gronds stoppian a media vista installar ils panels solars. Excepziuns avessi dà per chasas d'abitar.
Stgaudaments electrics
Plinavant na vul il Cussegl naziunal er betg scumandar boilers u stgaudaments electrics fin il 2040. Ina maioritad da la sanestra vuleva remplazzar quels entras boilers cun pumpas da stgaudar.