Siglir tar il cuntegn

Header

video
Ueli Maurer: «Questa crisa vegnin nus a sentir anc en 10 onns en las finanzas»
Or da News-Clip dals 30.11.2021.
laschar ir
cuntegn

Debatta da budget 2022 Approvà cun pitschnas midadas il preventiv

Tradiziunalmain dovran las debattas da budget mintgamai fitg bler temp durant la sessiun d'enviern. L'emprima runda è dentant stada a fin suenter be trais uras en il Cussegl dals chantuns. En general hai dà pauca critica envers ils plans dal Cussegl federal.

Il Cussegl dals chantuns ha approvà il preventiv da la Confederaziun per l'auter onn. Quai be cun pitschnas midadas envers il sboz dal Cussegl federal. Tar expensas da bun 80,7 milliardas francs, fa quest quint in deficit da 2 milliardas.

Il deficit sa resulta perquai ch'i vegn vinavant finanzià numerusas mesiras da pandemia. Malgrà quai ha il Cussegl dals chantuns sco emprim cussegl però decis dapli expensas.

Tranter auter duai dar:

  • 233 milliuns francs supplementars per l'infrastructura da viafier
  • 8 milliuns dapli per purs da latg
  • 7 milliuns dapli per la cultivaziun da ravas da zutger
  • 5,6 milliuns dapli per il program «Energia Svizra»
  • 1,24 milliuns dapli per dus projects da MeteoSvizra
  • 660'000 francs dapli per in post d'annunzia per unfrendas da mulestas en il sport

Cumpensar vul il Cussegl dals chantuns sias extradas cun spargnar tar il persunal sur tut ils departaments, quai duai purtar 21 milliuns francs. Dentant cumpensescha el uschia be per part sias expensas supplementaras. Uschia custass la proposta dal Cussegl dals chantuns anc adina 235 milliuns dapli che la proposta dal Cussegl federal.

Vegn vitiers che cun questas expensas surpassass la Confederaziun il frain da custs. Perquai vul la Chombra pitschna metter las expensas en connex cun corona, per il traffic da trens sin la glista per expensas extraordinarias.

RTR novitads 15:00

Artitgels legids il pli savens

Scrollar a sanestra Scrollar a dretga