Aifer la debatta da la lescha da CO2 ha il Cussegl dals chantuns decidì ina taxa da 30 fin 120 francs per bigliets da sgol, tut tenor categoria e lunghezza da sgol. Ina mesadad da las entradas duain vegnir restituidas a la populaziun, l'autra mesadad duai vegnir pajada en in nov fond dal clima.
Il Cussegl dals chantuns è stà da l'opiniun ch'era il traffic en l'aria stoppia prestar sia cumpart. I na giaja betg che viadis curts custian cun il tren dapli che cun aviun. Il pledader da la cumissiun, Damian Müller, ha fatg attent ch'ils Svizzers dovrian dubel uschè savens il traffic aviatic sco ils abitants dals pajas vischins. En tut chaschunian ils viadis cun aviun 11% da las emissiuns da CO2 en Svizra.
- videoDamian Müller: «Svizzers sgolan dubel uschè savens sco vischins»Or da News-Clip dals 25.09.2019.laschar ir. Durada: 51 Secundas.
Ord la debatta
Il Cussegl dals chantuns è s'exprimì per ina taxa sin bigliets da sgol.
Benzin e diesel custan dapli
En pli ha il Cussegl dals chantuns decidì mesiras per auzar il pretsch da diesel e benzin per maximalmain 12 raps il liter. Gia oz ston ils commerziants da carburant cumpensar ina part da lur imports. Ils custs pon els indossar als automobilists.
Fin il 2024 duai la cumpensaziun far pli char il liter carburant per maximalmain 10 raps, davent dal 2025 fin 12 raps. Quai ha la chombra pitschna decidì cun 28 cunter 15 vuschs.
- videoSommaruga davart ils pretschs per carburantOr da News-Clip dals 25.09.2019.laschar ir. Durada: 1 minuta 15 Secundas.
Ord la debatta
Ils pretschs per carburant duain vegnir 10 fin 12 raps pli chars.
Tar la votaziun generala en il Cussegl dals chantuns è la reediziun da la revisiun da la lescha vegnida approvada cun 37 vuschs gea e sulettamain ina vusch na. Il Cussegl dals chantuns è l'emprima chombra che ha tractà la reediziun da la revisiun. La fatschenta va uss en il Cussegl naziunal.
RR novitads 12:00++