Siglir tar il cuntegn
Inhalt

Svizra Debits ipotecars - in ristg per il martgà da finanzas

Ma tuttina na vul il Cussegl federal betg far propostas per midar il sistem da taglia.

Maletg simbolic - ina chasa ch'è fatga or da daners - pitgas da tschintg francs cun in tetg d'ina bancnota da 200
Legenda: Bleras Svizras e Svizzers han debits ipotecars Keystone

Cumpareglià cun la societad internaziunala èn ils Svizzers persunas cun blers debits. I sa tractia cunzunt da debits ipotecars. Questa situaziun portia ristgs per il martgà da finanzas. Quai è la conclusiun d'in rapport fatg sin incumbensa dal Cussegl federal.

Consequenzas intschertas

Il mument ch'ils tschains s'augmentian ed ils pretschs d'immobiglias giajan a val sajan las consequenzas per l'economia publica fitg intschertas. Tenor la banca naziunala na pudessan 40% da la populaziun gia uss betg supportar tschains da sur tschintg pertschient. L'onn 1990, cura ch'i aveva dà ina crisa d'immobiglias, avevan las bancas stuì scriver giu 42 milliardas francs.

Midar sistem da taglia

L'OECD, l'Organisaziun da cooperaziun e svilup economic en Europa, ed er l'FMI, il Fond monetar internaziunal han cusseglià a la Svizra da midar il sistem da taglia. Ins pudessi desister sin l'imposiziun da taglias sin l'atgna locaziun e persuenter scumandar da trair giu da la taglia ils custs d'immobiglias ed ils tschains da debits.

Il Cussegl federal scriva dentant che differentas provas da midar quest sistem hajan fatg naufragi en il parlament. Perquai na vul el betg elavurar il mument propostas en quest connex.

Formulà quest rapport ha ina gruppa da represchentants da l'administraziun da taglia, il Secretariat da stadi per l'economia, la banca naziunala e d'ulteriurs uffizis federals.

RR novitads 15:00