Siglir tar il cuntegn

Header

cuntegn

Decisiun dal Cussegl federal 23 enstagl da 21 casinos en Svizra

En Svizra duai esser pussaivel d'avrir dapli casinos. Quai ha decis il Cussegl federal. Enstagl da 21 datti en l'avegnir 23 lieus cun casinos. A partir dal 2025 vegnan vitiers Winterthur e Losanna. Uschia duai il potenzial dal martgà vegnir duvrà meglier.

Ils casinos da fin qua giogan ina rolla impurtanta en lur regiuns, tranter auter sco patrun da lavur. Dapi l'avertura 2002/03 hajan quels plinavant purtà entradas da 7,3 milliardas francs, ina gronda part da quels daners, numnadamain 6,3 milliardas, èn ids en l'AVS. Las concessiuns da fin qua scadan la fin dal 2024.

Concessiun A u B, tge munta quai?

Avrir la box Serrar la box

Tar casinos cun ina concessiun B datti ina limita da 25 francs per gieus d'automats. Era dastgan ils chantuns pretender ina taxa sin il retgav brut dals gieus, senza ils gieus online. Omaduas chaussas na valan betg tar ina concessiun A.

Novas reglas per casinos

Ils otg lieus cun in Casino A duain restar. Ils dus novs casinos duain era survegnir ina concessiun A. Plinavant vul il Cussegl federal conceder maximalmain 13 concessiuns da categoria B.

Da nov datti mo ina concessiun A, sch'il lieu dal casino pussibilitescha in retgav brut dals gieus, senza gieus online, da passa 30 milliuns francs ad onn. Quai è normalmain il cas, sche radund 300'000 persunas vivan betg pli lunsch ch'ina mes'ura cun auto davent dal casino. Per ina concessiun B dovria radund 10 milliuns retgav brut, sco il Cussegl federal ha decis da nov. Perquai dovri radund 100'000 persunas en il conturn dal casino.

Per casinos pitschens duai dar excepziuns. Uschia possian casinos per exempel en il Grischun u il Vallais argumentar cun blers turists e turistas, sch'il dumber d'abitants na vegnia betg cuntanschì.

Il proceder per las novas concessiuns è avert per tuts e vegn lantschà il matg 2022. Il Cussegl federal decida probablamain l'atun 2023. Quella decisiun è definitiva.

audio
Per tadlar: Las novitads da las 16:00
aus RTR Audio vom 27.04.2022.
abspielen. Laufzeit 2 minutas 33 Sekunden.

RTR novitads 16:00

Artitgels legids il pli savens

Scrollar a sanestra Scrollar a dretga