- Il Cussegl federal vul engrevgiar l'introducziun da tempo 30 sin las axas da traffic principalas. El realisescha in'intervenziun parlamentara che di che sin las axas da traffic principalas duai en general valair tempo 50.
- Scumandar il tempo 30 na vul il Cussegl federal betg, ma i duess dar strictas regulaziuns per l'introducziun.
- Sch’ina vischnanca vul introducir tempo 30 sin lur vias principalas, sto ella pudair demussar ch’il traffic na vegn betg spustà sin ina via tras in quartier cun pli pauc traffic.
- L’introducziun da tempo 30 per reducir la canera duess dentant adina anc esser pussaivel.
Las vischnancas han differents sentiments sur la regulaziun
A Tavau surpassa la canera da la via en divers lieus las limitas admessas. Perquai han l'uffizi da construcziun bassa dal chantun, ensemen cun la vischnanca da Tavau, realisà in project per resolver quel problem. Els vulan reducir il tempo sin 30.
La decisiun dal Cussegl federal che vul engrevgiar d’introducir il tempo 30 sin las vias principalas, pudess ussa avair in'influenza sin il project da Tavau. La decisiun finala, sche il project vegn realisà u betg, sto il chantun far quest atun.
La manadra dal departament da construcziun bassa e traffic public da Tavau, Claudia Bieler, è segira ch'il project vegn realisà.
Nus presupponin oz ch'il chantun s'exprima per ina reducziun dal tempo 30 sin basa dals projects da sanaziun da l'uffizi da construcziun bassa ch'èn avant maun.
Tar ils vischins a Claustra è la situaziun in'autra. Sin la via che maina tras lur vischnanca valia gia ussa tempo 30. L’idea saja atgnamain stada da far be ina part cun tempo 30 e da laschar l'autra part tar tempo 50, ma quai ha il tribunal administrativ chantunal refusà.
Cun las novas decisiuns dal Cussegl federal, sa pudessan ils plans da Claustra ussa tuttina midar. I pudess esser che els pon annullar puspè tscherts secturs parzials, ma quai na saja anc betg sclerì.
Il Cussegl federal stuess annullar la legislaziun da canera. Uschè ditg ch'i na vegn midà nagut en il sectur da canera, n'avess jau naginas schanzas che nus pudain annullar tscherts secturs parzials.
Ina blessura da l'autonomia communala
Tuttas duas vischnancas èn d'accord che la decisiun dal Cussegl federal è in'intervenziun en lur fatschentas. Las vischnancas possian valitar meglier, tge che saja il pli logic per lur vias ch'èn orientadas al traffic.
Durant il temp da la consultaziun che dura fin ils 5 da december, pon las vischnancas anc prender posiziun davart las adattaziuns ch'il Cussegl federal ha fatg.
Tge adattaziuns dal tempo ch'i dat en las autras vischnancas dal Grischun, pon ins vesair sin la suandanta grafica.
