Siglir tar il cuntegn

Header

cuntegn

Decisiuns en auters chantuns Turitg di Na a dretg da votar cun 16

Era en auters chantuns hai dà votaziuns – qua ina survista.

Ils Turitgais na dastgan betg votar cun 16

En il chantun Turitg resta la limita da votar tar 18 onns. Il suveran ha refusà da sbassar la vegliadetgna da votar ed eleger da 18 sin 16 onns, quai cun 64,7%. Turitg fiss stà suenter Glaruna pir il segund chantun ch'avess sbassà la vegliadetgna da vuschar da 18 sin 16 onns.

Argovia mida la lescha da taglia

En il chantun Argovia pajan interpresas grondas en l'avegnir bler pli pauc taxas sin gudogn e persunas natiralas in zic pli pauc taglia. Votantas e votants han approvà fitg cler ina midada correspundenta da la lescha da taglia. Quai munta che l'Argovia ha en l'avegnir perditas da taglia da fin a 220 milliuns francs ad onn.

Ultra da quai han votantas e votants da l'Argovia approvà cun dapli che 84% da las vuschs ina iniziativa per che era commembers e commembras da la regenza e dal parlament chantunal pon vegnir relaschads da lur uffizi. Ussa sto il parlament elavurar la lescha.

L'archiv statal da Son Gagl survegn dapli spazi

L'archiv dal stadi dal chantun Son Gagl vegn concentrà en in nov lieu e survegn dapli spazi – las votantas ed ils votants han approvà in credit da 44,3 milliuns francs. Il mument è l'archiv dal stadi repartì sin trais lieus a Son Gagl. Cun la glisch verda da las votantas e dals votants pon ins ussa elavurar il project da construcziun – las lavurs da construcziun duajan cumenzar il pli baud il 2025.

Berna rinforza ils dretgs dal suveran

Il chantun Berna rinforza ils dretgs dal suveran envers ils instruments dal parlament. Il suveran da Berna ha approvà cun 85% da las vuschs da midar la constituziun chantunala. Uschia po ina proposta dal suveran betg pli vegnir sutminada da propostas eventualas dal parlament. Quest tric tactic, era numnà «Buebetrickli» n'è uschia betg pli pussaivel.

Frain per las expensas en il Tessin

Il Tessin introducescha in frain per las expensas. Il suveran tessinais ha ditg cun bunamain 57% Gea a questa idea. La finamira è dad equilibrar il quint dal chantun enfin il 2025 e quai senza strapatschar las vischnancas ed augmentar las taglias. Il Tessin cumbatta dapi onns cunter cifras cotschnas en il budget. Per quest onn quinta la regenza cun in deficit da 135 milliuns francs.

En il Giura vegn sbassada la taglia da vehichels a motor

En il chantun Giura vegn sbassada la taglia da vehichels a motor. Las votantas ed ils votants han approvà cun dapli che 82% da las vuschs ina iniziativa dal pievel da las partidas burgaisas inoltrada il mars 2019. L'iniziativa pretenda che la taglia da vehichels a motor en il chantun Giura vegn sbassada sin la media svizra. Sco proxim dovri ina proposta per l'implementaziun.

RTR novitads 15:00

Artitgels legids il pli savens