Dretg penal per creschids na sa mida betg
L'execuziun da chastis tar il dretg penal per persunas creschidas resta senza midadas. Il Cussegl naziunal ha refusà ina proposta che vuleva midadas per persunas internadas – cunzunt la dumonda suenter novas reglas tar internaziuns da delinquents ha dà da discutar. Suenter in vi e nà han ils dus cussegls decis cunter ina internaziun sistematica da delinquents che commettan danovamain delicts. Quai na fiss tenor la maioritad betg
confurm a la convenziun dals dretg umans. Cun quest Na resta il dretg penal pia tar il status quo.
Armada svizra duai survegnir 4 milliardas dapli
Quatter milliardas francs dapli duai l'armada svizra survegnir ils proxims quatter onns. Sco gia il Cussegl dals chantuns vul era la cumissiun da finanzas dal Cussegl naziunal augmentar il rom d'expensas sin 29,8 milliardas.
Quest augment duai vegnir finanzià cun quatter mesiras. Tranter auter duai la cumpart ch'ils chantuns survegnan da la taglia federala directa vegnir sbassada, ma er cun reparter auter ils daners entaifer il departament federal da defensiun. La cunter-finanziaziun duai però per gronda part vegnir surlaschada al Cussegl federal.
Nagins exercizis cun la NATO
Plinavant vul il Cussegl naziunal scumandar a l'armada svizra da sa participar ad exercizis nua che la NATO trenescha per il cas ch'in pajas commember vegniss attatgà. Sche l'armada svizra fetschia part a tals exercizis muntia quai facticamain che la Svizra dettia si la neutralitad, uschia il tenor.
La chombra gronda ha approvà ina moziun correspundenta da sia cumissiun da segirezza cun 118 encunter 69 vuschs. Sch'er il Cussegl dals chantuns di Gea a la moziun sto il Cussegl federal adattar las cundiziuns legalas respectivas.
Trais novs derschaders per il Tribunal federal
Il Grischun Patrick Guidon fa da nov part dal Tribunal federal a Losanna. Il parlament ha elegì Guidon, ensemen cun il Bernais Christian Josi e Sandra Wohlhauser dal chantun Friburg – per il rest da la perioda d'uffizi 2021 fin 2026. Las elecziuns èn stadas necessarias perquai che duas derschadras van en pensiun la fin da l'onn. Vitiers aveva in derschader annunzià da sa retrair sin la fin dal december 2024.
Fiera d'electricitad duai vegnir controllada pli sever
La fiera d'electricitad duai vegnir controllada pli sever. Il cussegl naziunal ha approvà unanimamain la lescha federala davart la surveglianza e transparenza en la fiera d'energia a l'engrossa. Cun questa nova lescha duain interpresas d'electricitad svizras ch'èn relevantas per il sistem augmentar lur transparenza. Latiers duain ils ristgs per l'economia publica vegnir reducids. Cun scumandar il commerzi d'insiders e la manipulaziun da la fiera vul ins cuntanscher pretschs pli gists.
La raschun per la nova lescha è ch'ils pretschs da la fiera d'electricitad èn creschids fermamain dapi che la guerra en l'Ucraina ha cumenzà.
Cussegl naziunal crititgescha sentenzia dal clima europeica
Er il Cussegl naziunal crititgescha la sentenzia dal clima dal Tribunal europeic dals dretgs umans a Strasbourg. Sco gia il Cussegl dals chantuns na vul er la chombra pitschna betg prender ulteriuras mesiras per la protecziun dal clima. Suenter in recurs da l'uniun «Senioras dal clima» aveva il Tribunal europeic dals dretgs umans constatà che la Svizra n'haja betg fatg ses duairs areguard la protecziun dal clima. Il parlament è da l'avis ch'il tribunal haja surpassà ils cunfins lubids per il svilup dal dretg ed ignorà process da dretg democratics.
Parlament è cunter dapli biodiversitad sin ers
Puras e purs na duain betg stuair metter a disposiziun dapli spazi per biodiversitad. Quai ha il parlament decidì. Planisà era che manaschis cun passa trais hectaras stoppian pudair demussar 3,5% da lur surfatscha sco surfatscha da biodiversitad. Atgnamain stuessan questas mesiras gia esser en vigur. Gia duas giadas è l'introducziun dentant vegnida spustada. Uss croda ella definitivamain. Il cussegl dals chantuns ha approvà ina moziun or dal cussegl naziunal.
Repatriaziun via stadi terz
Requirents d'asil da l'Eritrea – che vegnan refusads en Svizra – duajan vegnir repatriads via in stadi terz. Quai vul suenter il Cussegl dals chantuns er il Cussegl naziunal. El ha approvà ina moziun en chaussa. Il mument n’èsi betg pussaivel da manar enavos persunas da l’Eritrea en lur patria, perquai che l'Eritrea refusescha repatriaziuns sfurzadas. Uss duai il Cussegl federal negoziar ina cunvegna cun pajas da transit ch’acceptan requirents d’asil refusads.
Nums dubels duain puspè esser pussaivels
Nums dubels duain puspè esser pussaivels per pèrs maridads e partenaris registrads – per uffants dentant betg. Quels duain er purtar en l'avegnir in sulet num. Il Cussegl naziunal ha approvà ina refurma dal dretg dals nums. En il futur duai pia mintgina e mintgin pudair sa decider individualmain per il num ch'el u ella vul purtar suenter esser maridà. Tar in num dubel sto vegnir declerà, en tge successiun e schebain cun u senza stritg tranteren. La fatschenta va uss enavos en il Cussegl dals chantuns.
Parlament vul er far diever da la Plazza federala
La Confederaziun duai survegnir dapli influenza sin la Plazza federala ed il spazi public avant la Chasa federala. Il Cussegl naziunal ha acceptà ina moziun da ses biro senza opposiziun. Questa moziun pretenda ch'il Cussegl federal entria en contractivas cun la citad da Berna – cun la finamira ch'il parlament, respectiv il Cussegl federal, la citad ed il chantun da Berna regleschian communablamain il diever dal spazi public enturn la Chasa federala. La situaziun actuala na satisfetschia betg, damai che la citad decidia praticamain suletta.
Examinar meglier daners per Palestina
L'agid a la Palestina sto vegnir controllà meglier. Il Cussegl federal duai examinar pli detagliadamain daners d'agid ad organisaziuns ed instituziuns. Suenter il Cussegl naziunal ha er il Cussegl dals chantuns approvà stgars ina moziun correspundenta cun 21 cunter 20 vuschs. I duai cunzunt vegnir garantì ch'ils daners na vegnan betg surduvrads per finanziar terror. Sch'organisaziuns appelleschan ad odi e violenza duain ils daners pudair vegnir stritgads.
Plan d'acziun cunter rassissem
La Confederaziun duai elavurar ina strategia ed in plan d'acziun cunter rassissem ed antisemitissem. Quai vulan las duas chombras parlamentaras. Suenter il Cussegl naziunal ha era il Cussegl dals chantuns approvà ina moziun cun ina pretensiun correspundenta. Tenor la moziun sto il Cussegl federal rinforzar il post spezialisà per il cumbat cunter rassissem. Quai cun avunda persunal. Ultra da quai duai il Cussegl federal laschar actualisar da la Confederaziun, ils chantuns e las vischnancas in rapport tar mesiras cunter l'antisemitissem. La moziun era vegnida inoltrada suenter ch'i aveva dà pli e pli blers cas da rassissem ed antisemitissem en Svizra, cunzunt dapi il cumenzament da la guerra en la Strivla da Gaza.
Damain daners per assicuranza da dischoccupads
L’assicuranza da dischoccupads na duai betg survegnir 1,25 milliardas francs sur ils proxims tschintg onns. Il Cussegl naziunal ha approvà sco emprima chombra la proposta dal Cussegl federal. En vista als deficits planisads per ils proxims onns era la maioritad dal Cussegl naziunal da l'avis che las mesiras proponidas contribueschian da dar in cuntrapais als deficits structurals. La mesira po vegnir prendida senza influenza sin las prestaziuns da l’assicuranza da dischoccupads. La fatschenta va uss en il Cussegl dals chantuns.
Dapli rumantsch e talian ordaifer lur territoris da tschep
Il Cussegl dals chantuns di unanimamain Gea a la promoziun dal rumantsch e dal talian, er ordaifer las regiuns da tschep. Quai en il rom da la discussiun en il parlament enturn il messadi da cultura. Sco proxim sto il Cussegl naziunal anc dar il consentiment.
Era il messadi da cultura sco tal ha il Cussegl dals chantuns approvà per gronda part. La chombra pitschna ha uschia dà liber radund 990 milliuns francs per per ils onns 2025 fin 2028. Refusà ha il Cussegl dals chantuns ina proposta dal Cussegl federal da midar la lescha davart la protecziun da la natira e da la patria. Il Cussegl federal vuleva promover a moda explicita ina «cultura da bajegiar en l'aut». Ina maioritad da la chombra gronda è entant stada da l'avis che las directivas actualas bastan. Ultra da quai saja questa promoziun chaussa dals chantuns.
Cussegl naziunal na renconuscha betg la Palestina
La Svizra na duai betg renconuscher la Palestina sco stadi. Quai ha decis il Cussegl naziunal. El ha refusà cleramain ina moziun or da las retschas da la PS. La moziun è stada colliada cun la pretensiun che la Hamas laschia liber tut ils ostagis israelians ch’ella aveva rapinà l’october passà. Tenor il minister da l’exteriur, Ignazio Cassis, sustegna la Svizra vinavant ina schliaziun da dus stadis. Dal punct da vista dal Cussegl federal èsi dentant il fauss mument da renconuscher la Palestina sco agen stadi.
La 13avla renta na duai betg survegnir daners or da l'agid al svilup
L’agid al svilup na duai betg vegnir scursanì en favur da la 13avla renta da l’AVS. Il Cussegl naziunal ha refusà ina moziun or da las retschas da la PPS. La fatschenta è uschia giud maisa.
Dapli daners per l'armada – però nagin fond spezial
Il Cussegl dals chantuns vul dapli daners per l'armada. Il rom da pajaments per ils onns 2025 fin 28 duai vegnir auzà per quatter milliardas francs sin 29,8 milliardas. Per il program d'armaziun vul el impunder 660 milliuns francs dapli ch'il cussegl federal. Percunter na vul la chombra pitschna betg crear in fond spezial per finanziar l’armada e sustegnair la reconstrucziun en l’Ucraina. Ina clera maioritad ha ditg Na ad ina proposta da la cumissiun da segirezza.
Daners per la protecziun da muntaneras duain tanscher quest onn
Quest onn duain ils daners da la Confederaziun per la protecziun da muntaneras bastar. Quai ha ditg il Cusseglier federal Albert Rösti a chaschun da l'ura da dumondas en il Cussegl naziunal. Il temp per dumandar per daners per la perioda d'alpegiaziun 2024 cuzzia bain anc, fin qua na dettia però nagina mancanza dals daners. Ils set milliuns francs ch'il parlament aveva lubì duain bastar, uschia Rösti. L'onn passà eran ils meds finanzials da la Confederaziun per la protecziun da muntaneras stads duvrads mez da l'onn.
Parlament decida 400 milliuns per digisanté
Il sectur da sanadad svizzer duai vegnir digitalisà meglier. Sco segunda chombra ha il Cussegl dals chantuns approvà in credit d'impegn da stgars 400 milliuns francs per ils proxims 10 onns. L'entir program da digisanté cumpiglia radund 50 projects. Cun quels vul la Confederaziun meglierar la qualitad dals tractaments, sco er l'effizienza e la transparenza en il sectur da sanadad. Latiers duai la segirtad da pazientas e pazients vegnir meglierada. Dasper digitalisar registers, sistems d'annunzia e plattafurmas d'infurmaziun duain quests sistems pudair communitgar cun auters sistems dad IT.
En favur da l'inclusiun – Las sessiuns survegnan suttitels
Las transmissiuns directas or dal parlament a Berna han en l'avegnir suttitels. Sco gia il Cussegl naziunal ha uss er il Cussegl dals chantuns approvà il project. Quel duai dar la pussaivladad a persunas senza udida, u cun impediment d'udida da persequitar las debattas. Previs è ch'in program ch'identifitgescha la vusch fa ils suttitels. Silsuenter vegnan quels controllads a maun. Ils suttitels duain mintgamai esser avant maun en la lingua dal pledader u da la pledadra. Il sistem duai ir en funcziun en il decurs da l'onn proxim.
Entradas accessoricas restan chaussa dals parlamentaris e da las parlamentarias
Ils parlamentaris a Berna duain er en l'avegnir betg stuair inditgar quant ch'els gudognan cun occupaziuns accessoricas. Il Cussegl dals chantuns ha refusà in'iniziativa parlamentara da Lisa Mazzone dals Verds, cun 22 cunter 18 vuschs ed ina abstenziun. Actualmain ston ils parlamentaris bain declerar occupaziuns accesoricas ed inditgar sche quellas èn pajadas u betg. L'autezza d'eventuals pajaments n'è dentant betg da precisar.
Dapli daners per il sectur d'asil
Il cussegl naziunal ha approvà 255 milliuns dapli che budgetà per il sectur d'asil per l'onn 2024. Il secretariat da stadi per la migraziun (SEM) ha curregì las previstas per la migraziun da quest'onn. Perquai dovri dapli letgs che calculà oriundamain. Era duai il SEM engaschar dapli persunas temporarmain per pudair lavurar giu pendenzas.
Plinavant vul il cussegl naziunal 15 milliuns francs dapli per il campiunadi europeic da ballape da las dunnas il 2025 en Svizra. Uschia duai l'eveniment survegnir bunamain quatter giadas uschè bler sco quai ch'il Cussegl federal aveva proponì, en vista a las stretgas finanzialas da la Confederaziun.
Sco proxim tracta il Cussegl dals chantuns las fatschentas davart ils credits supplementars.
Cussegl naziunal approva quint
Il Cussegl naziunal ha approvà il quint statal federal da l’onn passà. Il 2023 ha la Confederaziun fatg in deficit da 1,4 milliardas francs. Critica hai cunzunt dà da la PPS ch’ha ditg Na al quint. Ins stoppia finalmain tegnair mesira tar las expensas, uschia la critica. Tuttina ha la maioritad da la Chombra gronda approvà il quint. Sco proxim va la fatschenta en il Cussegl dals chantuns.
Prevista: La sessiun da stad cumenza cun bleras fatschentas
A Berna ha la sessiun da stad dal Parlament federal cumenzà. Sin las parlamentarias ed ils parlamentaris spetga ina lunga glista da pendenzas fin ils 14 da zercladur. Tranter auter vai per l’avegnir da l’armada, da la furmaziun e da la cultura – e quai en vista a la situaziun finanziala da la Confederaziun ch’è tendida. Il Cussegl naziunal ha reservà radund 75 uras per sias tractandas, il Cussegl dals chantuns radund 56 uras.
Da discurrer vegnan a dar differents dossiers brisants durant la sessiun. Il Cussegl dals chantuns decida en il rom da la Missiva davart l'armada 2024 quant svelt che l'armada svizra duai survegnir dapli daners. Per ils onns 2025 enfin 2028 dumonda il Cussegl federal in rom da pajament da stgars 26 milliardas francs. La Cumissiun per la politica da segirezza pretenda 4 milliardas dapli. Plinavant debattescha la Chombra pitschna davart la proposta da la cumissiun da crear in fond da 15 milliardas per finanziar l'armada e la reconstrucziun en l'Ucraina, quai per guntgir il frain da debits.
Spargnar ed augment pli pitschen
Per ils proxims onns quinta la Confederaziun cun deficits structurals dad enfin quatter milliardas francs mintg’onn, quai sch'i na vegnian prendidas naginas cuntramesiras, admonescha il Cussegl federal. Il Cussegl naziunal discutescha davart in'emprima mesira da spargn: Ils proxims tschintg onns duai la Confederaziun pajar 1,25 milliardas francs damain a l'Assicuranza cunter la dischoccupaziun. Da l’autra vart prevesa il parlament da dar ora dapli daners per la furmaziun e la perscrutaziun che quai ch'il Cussegl federal propona: La cumissiun responsabla propona al Cussegl naziunal d'augmentar il rom da pajament per ils onns 2025-2028 per 152 milliuns francs. Per las scolas autas e la ETH na basta quai dentant anc adina betg per segirar la cumpetitivitad da la Svizra. Ellas pretendan anc dapli daners.
Sistem d’asil pli restrictiv
Il Cussegl naziunal ha da decider davart pliras intervenziuns che pretendan midadas en il sectur d'asil. Gist l'emprim di da la sessiun vai per la pratica pli liberala dal Secretariat da stadi per migraziun SEM en connex cun dumondas d'asil da dunnas afganas. Ella duai puspè vegnir revocada u almain daventar pli rigurusa. En la terza emna da la sessiun vegn votà tranter auter davart ina intervenziun che vul permetter da repatriar requirents d'asil da l'Eritrea en in stadi terz.