La chombra gronda ha debattà il project da lescha dal Cussegl federal che duai reglar da nov las pussaivladads d’inoltrar documents da taglia a moda electronica senza stuair suttascriver in formular ni ina quittanza. Oz na lubescha la lescha betg quai.
RTR: Oz èsi en il Grischun gia pussaivel d’inoltrar la decleranza da taglia a moda electronica. Tge duai sa midar?
Adrian Camartin: Ins duai pudair far quai cumplettamain a moda electronica. Oz n’è quai betg pussaivel. Era tgi che inoltrescha la decleranza da taglia e tut ils formulars e quittanzas a moda electronica a l'administraziun chantunala da taglia sto a la fin envidar il squitschader per squitschar la quittanza. Mo sche quai document è suttascrit e tramess a l'administraziun da taglia a Cuira vala la decleraziun da taglia sco inoltrada. Pia, senza palpiri na vai betg.
Gist quai ha era disturbà il Cusseglier dals chantuns dal Grischun Martin Schmid da la pld. Avant trais onns ha el perquai inoltrà ina moziun che pretenda da reglar da nov quai e da far fin cul palpiri. Quella è vegnida acceptada ed ussa ha il Cussegl federal preschentà sia proposta co reglar quai.
RTR: I duess pia vegnir pli simpel. Tuttina datti era resistenza cunter il project preschentà. Tge èn ils puncts dispitaivels?
Adrian Camartin: Il Cussegl federal ha qua vis la chaschun da gist reglar e midar in'entira retscha da chaussas en differentas leschas da taglia.
Tar diversas taglias federalas, sco per exempel la taglia sin plivalur, vul la Confederaziun survegnir la cumpetenza da pretender che quels formulars vegnan mo pli inoltrads a moda electronica. Per ina maioritad da la cumissiun dal Cussegl naziunal va quai memia lunsch. Cunzunt interpresas pli pitschnas pudessan esser surdumandadas cun quai, teman cunzunt ils burgais.
En dus auters puncts va la cumissiun dentant pli lunsch ch'il Cussegl federal. I va là per las cumpetenzas dals chantuns. Ina clera maioritad vul che las administraziuns da taglia chantunalas ston metter a disposiziun la pussaivladad d'inoltrar la decleraziun da taglia cumplettamain a moda electronica. Il Cussegl federal vul surlaschar quai a mintga chantun.
La cumissiun vul plinavant ch'i vegn duvrà en l'entira Svizra ils medems formulars ed ils medems formats da datotecas per inoltrar quels documents. Il Cussegl federal vuleva stritgar quai ord la lescha.
RTR: Tuttina intginas chaussas che duain vegnir adattadas. Cura pudain nus inoltrar la decleraziun da taglia cumplet electronic?
Adrian Camartin: Il Cussegl naziunal è l’emprima chombra che ha tractà la fatschenta. Gia ella sessiun d’enviern vegn il Cussegl dals chantuns a debattar la chaussa. L’auter onn vegnin nus pia segir anc a stuair suttascriver ina quittanza e trametter quai document a l’administraziun da taglia. Las schanzas èn dentant bunas che la pussaivladad electronica vegn introducida per l’onn 2022.
En il Grischun pudess quella pussaivladad nova lura vegnir introducida pulit spert. Sco quai che l’administraziun da taglia dal Grischun ha ditg a mai sajan els gia pli u main pront e spetgian mo pli sin la glisch verda da Berna.