Curt e concis:
- Il futur na duain ins betg pli stuair suttascriver la decleraziun da taglia.
- Uschia duai la decleraziun da taglia a moda electronica vegnir simplifitgada. Per ils blers pajataglia mida nagut.
- Il mument basegna quai ina suttascripziun sin in document da palpiri.
Suenter la chombra pitschna ha oz era il Cussegl naziunal approvà ina moziun dal cusseglier dals chantuns grischun Martin Schmid da la pld. Malgrà che blers chantuns porschan la pussaivladad d'inoltrar la decleraziun da taglia a moda electronica èsi anc adina necessari da confirmar la legitimitad da las indicaziuns cun suttascriver in document da palpiri. Tenor Martin Schmid n'è quai dentant betg necessari.
Cun quai ch’ins trametta sez la decleraziun pon ins era declerar ch’ins ha legì tut, ch’ils documents e las indicaziuns èn correctas e cumplettas. E quai pon ins reglar uschia en la lescha.
Per ils blers pajataglia na midia nagut. Il futur possian els trametter tut ils documents a moda electronica, uschia Schmid.
Il Cussegl federal ha annunzià da vulair implementar la nova regla ella proxima revisiun da las leschas da taglia correspundentas.
RR novitads 11:00
