La Partida populara svizra sa referescha sin cifras che l'Uffizi federal da statistica ha publitgà la fin da zercladur. Il 2019 han ins desistì d'ina expulsiun tar 42% dals cas. La raschun è tenor la PPS la clausula per cas da direzza.
Differents facturs per decisiun
Sin la decisiun da bandischar insatgi u betg hajan la grevezza dal delict ed er il status da dimora gì influenza, scriva il BFS. Per exempel saja il ristg da stuair bandunar la Svizra suenter in mazzament, prest 80 giadas pli aut che tar insatgi che ha cugliunà per survegnir prestaziuns socialas.
Per persunas senza in status da dimora B u C è il ristg da stuair bandunar il pajais 14 giadas pli aut che tar insatgi cun in status da dimora C. Er èn persunas da l'exteriur naschidas en Svizra vegnidas bandischadas pli pauc savens che persunas naschidas en l'exteriur.
PPS vul stritgar clausula da direzza
La Partida populara pretenda uss da bandischar consequent persunas da l'exteriur suenter avair commess delicts penals. Ella vul stritgar la clausula da direzza per excepziuns tar delicts nua ch'igl è obligatoric da bandischar ils delinquents. Plinavant pretenda la partida scleriment davart il diever da la clausula en ils chantuns e co i vegn argumentà sin fundament da quella. Sche questa clausula vegnia vinavant duvrada a moda excessiva, pondereschia la partida da realisar in'ulteriura iniziativa dal pievel.
