Siglir tar il cuntegn

Header

Video
Pliras milli persunas èn stadas a demo a Turitg
Or da News-Clip dals 12.10.2019.
abspielen
cuntegn

Demos cunter Tirchia A Turitg ed a Bellinzona han millis demonstrà

Plirs milli han demonstrà sonda suentermezdi a Turitg cunter las attatgas tircas sin citads curdas en il nord da la Siria. Er a Bellinzona hai dà ina manifestaziun.

Il motto da la manifestaziun a Turitg è stà: «Na, a la guerra en la Siria dal nord e da l'ost». Curt suenter las 15:00 è la fulla da glieud sa messa sin viadi en direcziun center da la citad. Els èn vegnids accumpagnads da musica populara curda. Incaps haja dà nagins ha la polizia da la citad declerà sin dumonda da l'agentura da novitads Keystone SDA.

Er a Bellinzona hai dà demonstraziuns cunter l'invasiun tirca en las regiuns curdas da la Siria. Radund 300 persunas èn sa participadas.A Berna avevan gia venderdi saira radund 1'000 persunas demonstrà, ils blers dad ellas Curdas e Curds.

Critica er da la Liga Araba

La Liga Araba ha condemnà fermamain l'offensiva militara tirca en il Nordost da la Siria. Quai saja in'invasziun en in stadi arab ed in'attatga sin sia suveranitad, ha ditg il secretari general Ahmed Abdul Gheit.

Zona da segirezza

La Tirchia aveva cumenzà mardi in'offensiva militara cunter la milissa curda YPG en la Siria. La Tirchia vesa l'YPG sco milissa terroristica e vul crear per lung dal cunfin statal in'uschenumnada zona da segirtad – e quai sin territori sirian.

RR novitads 18:00