Sch'il trend cuntinuescha uschia, lura desistia en tschintg onns mintga dieschavel da charn. Ils ultims onns è la cumpart da persunas che mangia vegetarian u vegan creschida per en tut 14%, mussan las cifras dal rapport da Swissveg. Ina differenza saja da constatar tranter umens e dunnas sco er en las gruppas da vegliadetgna.
vegetarian | vegan | |
dunnas | 5,3% | 1% |
umens | 3,5% | 0,2% |
persunas 14-34 onns | 6,5% | 1% |
persunas sur 55 onns | 2,5% | 0,3% |
Sper quai hajan ins er constatà in boom tar il consum da products da substituir charn. Uschia haja la mesadad da las persunas vegetarias u veganas inditgà da consumar tals products.
Preschientscha mediala dals disavantatgs da charn
Motiv per pli pauc consum da charn è tenor l'uniun Swissveg per l'ina la preschientscha mediala dals dischavantatgs da consumar charn e per l'autra la pussaivladad da s'infurmar a moda simpla en l'internet. La gronda part da las persunas che sa nutreschan vegan u vegetarian fetschian quai or da motivs ecologics ed etics per la dignitad dals animals. Pir en segunda lingia giaja per l'atgna sanadad e l'alimentaziun globala.