Siglir tar il cuntegn
Inhalt

Svizra Detaglists svizzers vendan puspè damain

Ils detaglists svizzers han er vendì damain il settember. Cumapreglià cun il medem temp da l'onn passà èn las svieutas sa reducidas per 2,7%, resulta da las novas cifras da l'uffizi federal per statistica. Dapi il schaner 2015 vendan ils detaglists en Svizra mintga mais damain.

butia cun vestgadira e clients che van
Legenda: Il pli fitg han patì las svieutas en il sectur da vestgadira e chalzers. Keystone

La gronda part da la reducziun saja d'attribuir al consum tschessant da -2,3%. Effects da midadas dal pretsch muntian a -0,4%, rapporta l'Uffizi federal per statistica sin basa da resultats provisorics.

Il mender tar vestgadira e chalzers

L'ulteriur enclin dal settember actual saja d'attribuir a la reducziun en il sectur 'na-mangiativas' (senza carburant). Là sajan las svieutas sa reducidas per radund 5,8%. Il mender sajan marschadas las fatschentas cun vestgadira e chalzers cun -9,3%.

Il meglier tar victualias, bavrondas e tubac

Il sectur da las victualias crescha però vinavant. Las svieutas cun victualias, bavrondas e tubac è creschì per 0,6% – senza charischia per 0,2%.

RR novitads 11:00