Anna-Seraina Arquint Sonder ha ragischs engiadinaisa, è dentant dapi ditg a Cuira. Audituras ed auditurs han gì la pussaivladad da telefonar en il studio e far dumondas ubain raquintar, tge che fatschenta actualmain e tge strategias ch'els han d'ir enturn cun la crisa da corona.
Qua pudais tadlar suenter las intervistas cun la psicoterapeuta.
Di d'acziun sanadad psichica
Divers studis e retschertgas mussan che la crisa da corona smatga sin la morala da la populaziun svizra. Cunquai che la pandemia vegn anc a durar e ch'ils mais d'enviern èn per regla psichicamain pli pretensius, lantscha l'Uffizi federal da sanadad sin incumbensa dal Cussegl federal in di d'acziun davart il tema sanadad psichica. Il temp da pandemia vegnia savens accumpagnads da malsegirezzas, quitads, temas ed isolaziun. Quai pervia ch'ins n'haja betg la controlla davart quai che capita.
Er la SSR ed RTR fan part dal di d'acziun per la sanadad psichica. Gievgia bun'ura tranter las 8:00 e 9:00 uras è la psicoterapeuta Anna-Seraina Arquint Sonder en il studio da radio da RTR. Ella ha ina pratica da terapia a Cuira e lavura gia passa 38 onns sco psicologa.