Siglir tar il cuntegn

Header

cuntegn

Di da l'emprendissadi Emprendissadi: il pass en il mund da lavur

Il pass dal stgalim aut en l'emprendissadi è in grond – l’emprima giada han ins in schef u ina scheffa e blers dals collavuraturs e collavuraturas èn creschidas. Ins lavura, va a scola e visita curs ordaifer il manaschi.

Emprendissadi sco bierer

Per Reto Truog da Scuol saja il pass da la scola en l'emprendissadi stà simpel. Er perquai ch'el ha fatg il 10avel onn da scola ed aveva temp in pau pli ditg da sa sviluppar. Avant bunamain in onn ha el cumenzà cun ses emprendissadi sco bierer tar Heineken a Cuira. Reto Truog ha ina gronda passiun per questa lavur e declera ils differents pass da la producziun.

Jau ves la biera auter, i n'è betg mo per far festa mabain insatge ch'è impurtant per la societad.
Autur: Reto Truog emprendist da bierer
audio
Giarsunadi sco bierer – Reto Truog da Scuol
ord Actualitad dals 10.05.2023. Maletg: RTR
laschar ir. Durada: 4 minutas 11 Secundas.

Ina part da la lavur è da controllar la producziun sur il computer. In'autra lavur è da prender provas da la biera, uschia che tut constat. Da controllar saja fitg impurtant, cun quai che la producziun da biera è in process biologic e perquai che las leschas da nutriment en fitg strictas en Svizra. Reto Truog di ch’il squitsch da far tut correct è grond. Dentant haja el in grond sustegn da ses superiurs e collavuraturas.

Bierbrauer, Lehre, Berufsbildung
Legenda: Reto Truog vuleva far insatge spezial – ussa fa el l'emprendissadi sco bierer. RTR

Survista dad emprendissadis en il Grischun

En Grischun datti enturn 250 differentas professiuns ch'ins po tscherner sco emprendissadi. Durant il temp da scola èsi dentant grev da decider tge ch'ins vul far, tenor Nina Albin è quai chapibel. Ella lavura sco cussegliadra da professiun e carriera ed accumpogna e sustegna ils giuvenils e las giuvenilas.

Jau sustegn, dentant ston els ed ellas sez decider tge emprendissadi che plascha.
Autur: Nina Albin cussegliadra da professiun e carriera

L'onn 2022 hai dà bunamain 2'000 contracts dad emprendissadi en il Grischun. Dapi blers onns fan ils pli blers in emprendissadi sco commerziant, sco spezialista da commerzi en detagl e sco spezialist da sanadad. En media vegnan in quart da tut ils emprendissadis en Grischun ruts giu.

Quai para ina cifra enorm auta, dentant chattan blers directamain ina schliaziun.
Autur: Curdin Tuor manader da l'uffizi per la furmaziun professiunala

Ils emprendissadis vegnan ruts giu or da differents motivs:

  • la prestaziun è insuffizienta tar la lavur, en scola ed en ils curs ordaifer ils manaschis
  • la selecziun da la professiun constat betg pli
  • motivs privats
  • motivs da sanadad
audio
Il sustegn per emprendists ed emprendistas
ord Actualitad dals 10.05.2023. Maletg: RTR
laschar ir. Durada: 3 minutas 52 Secundas.

RTR actualitad 11:00

Artitgels legids il pli savens