Energias fossilas na destrueschian betg mo il clima, mabain er la democrazia e dretgs umans. Ellas sajan ina smaladicziun per ils umans en ils pajais ch'exploteschian ieli e gas, pertge ils retgavs vegnian da bun a dictaturs ed oligarchs.
Ecologia e pasch tutgian ensemen, ha accentuà il president dals Verds. Glättli ha pretendì in boicot da gas russ e sancziuns cunter Putin e ses aderents. 80% da las fatschentas cun materias primas dad oligarchs russ, giajan sur la Svizra. In fatg sin il qual la Polizia chantunala da Zug fetschia attent gia dapi decennis.
Solidaritad per ucranais
Cun ina minuta da silenzi ha la radunanza da delegads commemorà a las unfrendas da l'attatga russa sin l'Ucraina. Per ucranais ha Glättli sa drizzà a la populaziun en il territori cumbattì. «Nus essan solidarics cun ils carstgauns en l'Ucraina. Nagina guerra! Nagina oppressiun!», ha el ditg.
Fond da clima
Cuntanscher la midada en la politica d'energia vulan ils Verds cun in fond per il clima. Il lantschar ina tala iniziativa è punct principal en il program da l'inscunter. L'iniziativa prevesa che tranter 0,5 fin 1% dal product net intern dal pajais vegnan investids en projects per la protecziun dal clima e la biodiversitad. La PS ed ils Verds stattan communablamain davos questa pretensiun.