«Viva tia vita»: Quel moto metta en la vita en il center, e betg la paina. Quai di il President da la Confederaziun, Ingazio Cassis, en ses pled a chaschun dal di dals malsauns. Er persunas malsaunas mussian, ch'ellas sappian bain viver lur vita. Plinavant s'engrazia Ignazio Cassis a tut las persunas che sustegnan persunas malsaunas, sajan quai medis u tgirunzas, la famiglia, amias ed amis.
La vita saja dentant er ina sfida cun stortas nunspetgadas, che mettan sin il chau la vita dad in di sin l'auter. Quai possia esser in accident, ina malsogna u ina guerra. Ils patratgs da Cassis giajan tar quel punct a las persunas en l'Ucraina – nua ch'i n'è betg pussibel da viver l'atgna vita. En uschè muments saja impurtant da betg esser sulet e d'avair persunas che porschan sustegn.
Pled da minister da sanadad Peter Peyer
«Viva tia vita» na veglia betg dir, d’accentuar mo ses agens basegns, senza resguardar autras persunas ed aspects. Quai scriva il minister da sanadad chantunal, Peter Peyer, en ses pled. «Viver tia vita» veglia plitost dir da viver ina vita autodeterminada malgrà restricziuns. Per far quai pon ins dumandar agid: da confamigliaras e confamigliars, da las expertas e dals experts dal sectur da sanadad, d'instituziuns e d'uffizis.
Il Di dals malsauns duai encuraschar las persunas malsaunas da far valair lur basegns. Ma el duai er esser in «grazia fitg» per tut quellas e quels che s'occupan da persunas malsaunas.