Jau hai fatg in test d’udida tar Thomas Kröber dad Amplifon. Sco emprim dumonda el diversas chaussas pertutgond mia sanadad generala. Il test d’udida dura circa 30 minutas e cuntegna quatter parts.
- Jau stoss dir Gea cura che jau aud in tun sin ils uregliers
- Il tun sin ils uregliers daventa pli e pli dad aut ed jau stoss dir STOP cura ch'igl è memia dad aut
- Jau stoss discurrer suenter ils pleds che jau aud sin ils uregliers en differents volumens
- Sin in autpledader vegnan prelegidas frasas cun tschintg pleds ed jau stoss chapir almain trais da quests pleds. La difficultad è ch'in schuschuri è d'udir sur la frasa.
Il resultat da mes test è bun, jau aud 100%. Quest resultat correspundia en media ad ina dunna da 22 onns, di Thomas Kröber.
Trend da ramurs
ASMR stat per «Autonomous Sensory Meridian Response», in term che descriva il sentiment sco che persunas reageschan sin ramurs. I dat blers videos dad ASMR sin youtube, quel cun il pli grond success ha 38 milliuns clics. En quests videos fan surtut dunnas differentas ramurs en il microfon. Ils suandants tuns ins auda savens:
- Scutinar
- Scriver sin in fegl
- Sfruschar ils mauns
- Mangiar davant il microfon
- Dar si bellet
E quai tut datiers al microfon, uschia ch'i dat tuns tut spezials. E quests evocheschan tar persunas sentiments tut divers. Intginas chattan quests videos absurd u lungurus. Auters sa calman e sa durmentan meglier. Ed ad intginas persunas stimuleschan quests tuns, alura sentan ellas in sfurmiclim dal chau enfin la spina.