L'idea per quest di va enavos en l'onn 1963: Harvey Ball, in graficher da reclama american, ha gì l'incumbensa da crear in buttun per ina societad d'assicuranza per motivar ils lavurers e las lavureras. El ha lura pia dissegnà in rudè, picturà el mellen, ha mess vi anc dus puncts, tranter quels in mez rudè ed il smiley era naschì. Il smiley è spert vegnì fitg popular. L'onn 1999 ha l'artist decidì d'introducir il di internaziunal dal surrir.
Rir, surrir ed umor
Franziska Fruttiger s’occupa professiunalmain cun il surrir. Ella è trenadra da rir certifitgada a Basilea e dat differents curs da surrir, rir e d'umor. Tenor ella è quai numnadamain tut pussaivel d'emprender. La differenza tranter rir e surrir declera ella suandantamain: Il rir va anora e po esser dad aut. In surrir è il cuntrari: El vegn dad endadens e dovra paucs musculs. In surrir ves'ins oravant tut en ils egls.
Rir e surrir fan ventiraivel!
In surrir po tenor la trenadra dal rir avair differents motivs: in med da communicaziun, ina expressiun da plaschair u da surlevtg, ma era in segn nuncontrollà sch'insatgi è timid u ha tema.
I na dat savens nagin motiv da rir, sch'ins guarda sin noss mund. Lura èsi zunt impurtant da vesair ina fatscha amiaivla e surrienta.
E sch'i na dat ina giada nagina raschun da rir ha l'experta in tip co ch'ins sa senta svelt puspè ventiraivel: Simplamain sa sfurzar durant ina minuta da surrir, pia trair si ils lefs e spetgar tge che capita.