Uschia pretendan per exempel ils sindicats pass concrets cunter discriminaziun da paja e per tgira d'uffants. Tenor l'agentura da novitads Keystone-SDA sajan las pajais da las dunnas anc adina var 43% pli bassas che quellas d'umens.
A Cuira hai dà ina «Festa da dunnas», organisà da la Centrala da dunnas dal Grischun. Manifestaziuns hai tranter auter dà en las citads da Turitg, Basilea, Genevra e Losanna. Travail Suisse ha manà atras pliras acziuns decentralas. Tranter auter han ellas repartì flyers cun ina glista naira da firmas che na resguardan betg l'egualitad tranter um e dunna.
300 dunnas en Chasa federala
En Chasa federala a Berna èn vegnidas spetgadas passa 300 dunnas. La presidenta dal Cussegl dals chantuns, Eva Herzog, ha beneventà ellas. En in pled ha ella fatg attent che las dunnas stoppian esser finanzialmain independentas per pudair agir a moda libra e tenor ils agens basegns.
Durant il di hai dà differents workshops en Chasa federala – tranter auter cun las anteriuras cusseglieras federalas Ruth Metzler, Ruth Dreifuss e Simonetta Sommaruga e las interprendidras Rosmarie Michel e Danièle Felley workshops.