Carta interactiva - Nua vivan persunas cun Voss lieu d'origin? Chattai ora qua!
Mintga tschintgavla Svizra e mintga tschintgavel Svizzer viva en sia vischnanca natala u en sia vischnanca burgaisa. Quai mussa in'analisa da RTS. Nua vivan las persunas ch'han il medem lieu d'origin sco Vus? Chattai ora cun nossa carta interactiva.
El vegn dà vinavant da generaziun a generaziun e po esser in pitschen vitg da l'autra vart dal pajais: il lieu d'origin. Tschertins n'èn anc mai stads là, schebain ch'el sa chatta sin lur documents d'identitad. Auters èn restads al lieu da lur antenats. E da quels datti detg blers.
La metoda
Avrir la boxSerrar la box
En tscherts chantuns na correspunda il lieu d'origin betg adina ad ina vischnanca. Mintgatant poi sa tractar d'anteriuras vischnancas u da vischnancas burgaisas. Per far las cartas èn vegnids reunids ils differents lieus d'origin da la medema vischnanca.
Differents facturs sco maridaglia, l'acquist da la naziunalitad, la fusiun da vischnancas e.u.v. pon influenzar ils lieus d'origin da las persunas. Tscherts possedan plirs. Las datas da l'Uffizi federal da statistica (UST) che vegnan duvradas qua resguardan mo l'emprim lieu d'origin ch'è vegnì dà vinavant a las burgaisas ed als burgais svizzers tar la naschientscha u tar la natiralisaziun.
En cas rars (1676 persunas da passa 6,5 milliuns) n'è il lieu d'origin betg enconuschent. Quellas na vegnan betg resguardadas en las calculaziuns. Ultra da quai resguardan las datas mo las burgaisas ed ils burgais che vivan en Svizra, perquai ch'il UST n'ha naginas datas correspundentas per l'exteriur. Las datas reflecteschan la situaziun dals 31 da december 2024.
Stgars 1,35 milliuns Svizras e Svizzers abitan en lur lieu d'origin. Quai ha calculà Radiotelevisiun da la Svizra franzosa RTS sin basa da datas da l'Uffizi federal da statistica (senza persunas a l'exteriur; da leger en la chascha davart la metoda). Quai correspunda circa ad ina da tschintg persunas en Svizra.
Pertge èn las burgaisas ed ils burgais d'ina regiun sa sparpagliads pli fitg che dad in'autra? En il 19avel tschientaner ha l'industrialisaziun chaschunà in ferm moviment vers la citad en la vischinanza da las fabricas. Er l'amplificaziun da l'infrastructura da traffic enturn las citads ha augmentà lur attractivitad.
Legenda:
L'Emmental tutga tar las regiuns da la Svizra, nua che relativamain paucas persunas vivan anc adina en lur lieu d'origin.
Keystone
Oz vivan per exempel bundant la mesadad da las persunas cun il lieu d'origin Yverdon-les-Bains u Bellinzona precis en quests lieus (56% resp. 54%).
Malgrà tut las nianzas regiunalas resulta da las datas ina constanta: las Svizras ed ils Svizzers sa domicilieschan per regla en ina pitschna distanza da lur lieu d'origin e surpassan mo darar in cunfin linguistic. A la fin viva la gronda maioritad en ses chantun d'origin u en in chantun vischin, malgrà l'explosiun da la mobilitad durant ils ultims decennis.
Ina constataziun che regorda ad in'autra statistica, quella da las midadas da domicil. La distanza media da las midadas da domicil en Svizra è stada l'onn passà mo 13 kilometers.
