Ils costums, las gestas e la scenaria han creà ina atmosfera festiva, plaina da rir e smarvegl, laschond emblidar ils uffants il mintgadi en l'ospital per in mument. Intgins super eroxs èn schizunt sa tschentads sin la fatschada da l'ospital.
In'iniziativa naschida d'ina experientscha persunala
Davos l'acziun stattan anteriurs commembers dal GIGN (Groupe d’intervention de la gendarmerie nationale), e dal Raid (Recherche, Assistance, Intervention, Dissuasion) - omaduas unitads spezialas da la polizia franzosa - che han fundà l'associaziun «Super Héros Grand Cœur».
L'iniziativa è naschida d'ina experientscha persunala: avant Intgins onns ha il president da l'associaziun, Christophe Hernandez, accumpagnà sia figlia cura ch'ella ha stuì star pli lung en l'ospital.
«Jau hai realisà quant difficils che quests muments pon esser per ils uffants», sco el ha ditg la mesemna en l'emissiun 19h30 da RTS.
Muments magics
Durant la visita èn ils super eroxs era ids tras ils corridors e las stanzas da l'ospital per vesair quels che n'han betg pudì vegnir giuadora.
Ils uffants, fascinads da la parada e dals costums, han uschia gì muments magics che als han permess da siemiar d'aventuras extraordinarias e d'emblidar, per in suentermezdi, las restricziuns da l'ospital.
«Ils vairs super eroxs èn quests uffants che ston surmuntar gronds obstachels per guarir e puspè vegnir sauns. Nus gidain simplamain a surrir ed a passentar in bel temp ch'els na vegnan betg ad emblidar uschè spert», spera Christophe Hernandez.