Il president american Donald Trump stat sco exempel per la retorica dal pensar da summa nulla. Quai sa mussa en arguments sco: Sche ina migranta survegn ina plazza da lavur, munta quai ina plazza pli pauc per in burgais american. U: Quai che vegn producì en l'Asia na po betg vegnir producì en ils Stadis Unids.
Era en Svizra è la concepziun derasada che ina gruppa gudogna mo, sche in'autra perda. Entant che in terz crai che la prosperitad possia crescher per tuts, manegian ulteriurs 30% da la populaziun svizra che la prosperitad suonda ad ina logica da summa nulla. Quai resulta dal studi da l'universitad da Basilea che sa basa sin la segunda ediziun da la retschertga naziunala da la SRG «Co vai, Svizra?».
Quests 30% da consentiment per il pensar da summa nulla fa surstar Kelly Liu, co-autura dal studi, perquai che «la Svizra è in pajais ritg che fa tras gia relativamain ditg ina creschientscha economica.» Nunspetgà è per la perscrutadra era che questa maniera da pensar na po betg vegnir atribuida ad ina gruppa da populaziun specifica, saja quai areguard vegliadetgna, schlattaina, furmaziun u lingua.
Sur ils cunfins da las partidas
Il pensar en summas nulla na po betg vegnir attribuì ad ina partida politica specifica. Schebain ch'el è da chattar pli savens en il spectrum politic sanester en connex cun pretensiuns per dapli redistribuziun e dapli taxaziun da facultads.
Il studi mussa dentant: Tar ils simpatisants da mintga partida datti ina part da persunas che approveschan la suandanta constataziun: «La glieud po daventar ritga mo sin donn e cust da lur conumans». Medemamain datti en tuttas partidas ina part che represchenta l'opiniun cuntraria: «La bainstanza po crescher uschia ch'i dat avunda per tuts.»
Il pensar en summas nullas exista pia en l'entir spectrum politic – e cun quai er in potenzial che pretensiuns politicas correspundentas chattan approvaziun sur ils cunfins da las partidas ora.
«Qua para quai da dar sper la partiziun classica en sanestra e dretga ina segunda dimensiun», di il professer Alois Stutzer, coautur da la studia. Questa na cumpiglia betg per forza ils cunfins tradiziunals en la societad u las valurs da la glieud, mabain las ideas co che il mund funcziuna.
Fa il pensar en summa nulla sventiraivel?
La studia ha er examinà la relaziun tranter il pensar en summa nulla e la cuntentientscha. Il resultat: Persunas che partan fermamain questa moda da pensar èn main cuntentas cun lur vita. Davart las raschuns per quai possian ins mo specular, din ils auturs da la studia, ma la dimensiun saja significanta.
Acturs en il process politic pon empruvar d'abusar questa vista dal mund dals votants e da l'instrumentalisar per lur avantatg
Stutzer e Liu giavischan er dapli perscrutaziun en il sectur da l'instrumentalisaziun politica dal pensar en summa nulla. «Acturs en il process politic pon empruvar d'abusar questa vista dal mund dals votants e da l'instrumentalisar per lur avantatg», di Stutzer. Uschia pudess per exempel ina politicra utilisar in narrativ da summa nulla per giustifitgar ina politica da commerzi protecziunistica. U els pon empruvar da promover ina mentalitad da «nus» cunter «els» per daventar pli populars tar ils votants e per diffamar adversaris.
Co vai cun Vus e tge As occupa en Voss mintgadi? Cliccai sin la maletg sutvart e participai a la terza ediziun da la gronda retschertga da la SRG «Co vai, Svizra?»: