Pli ditg che ti spetgas e meglra che l'aura è, e dapli che ti stos pajar. Ils pretschs sa midan adina puspè. Quai aud'ins savens sur dals pass da skis da las grondas regiuns da skis che vegnan fixads dad algoritmus raffinads. È quai propi il cas?
Per vesair, co che quests algoritmus funcziunan, avain nus registrà dapi l'entschatta da november mintga di ils pretschs per ils pass da skis en dus territoris da skis da la Svizra franzosa: Verbier e Crans-Montana (vesair metodica en la box). Il resultat: Ils dus territoris da skis che sa basan sin sistems fitg differents n'han betg pretschs uschè dinamics sco supponì.
Verbier: trais categorias da tariffas
Cumenzain cun Verbier, il pli simpel dals dus lieus. Tenor nossas retschertgas datti mo trais categorias da pretsch che sa laschan resumar: Tariffas bassas, tariffas autas e tariffas fitg autas. La carta per persunas creschidas custa per exempel 79, 89 u 92 francs per las regiuns da skis Verbier – 4 Vallées. Tge pretschs valan per tge termins? Las datas rimnadas mussan ina logica detg clera:
- Pretschs fitg auts: durant las vacanzas da Nadal e da favrer, cura ch'ins po spetgar il pli grond dumber da giasts
- Pretschs auts: durant las fins d'emna e durant las vacanzas da Pasca
- Pretschs bass: durant l'emna ordaifer las vacanzas, sche las pistas n'èn betg fullanadas
Questas periodas paran d'esser fixadas a l'entschatta da la stagiun. Dapi che nus registrain ils pretschs n'èn ellas mai sa midadas.
Vitiers vegn in eventual rabat, sche l'empustaziun vegn fatga almain 10 dis ordavant. Il client survegn alura 10% rabat. Quest sistem – trais categorias ed in rabat fix tar l'empustaziun tempriva – vala per tut ils geners da purschidas pauschalas (uffants, giuvenils, abunaments da plirs dis, e.u.v.). I na dependa ni da l'utilisaziun ni da l'aura.
In pretsch che vegn limità dad auters gestiunaris
En il passà aveva Téléverbier fatg tests cun in sistem da tariffas che s'adattescha a la dumonda. Il problem era ch'il territori da skis è collià cun il territori da skis 4 Vallées che vegn administrà d'autras interpresas. Il pretsch maximal per ir cun skis a Verbier è pia vegnì limità cun il pass da skis per il territori 4 Vallées che lubescha l'access a l'entir territori. Quai ha limità la libertad d'agir da l'interpresa.
«Nus n'avain betg pudì optimar u maximar l'effect dals pretschs dinamics», declera Carole Moos, manadra commerziala da Téléverbier en l'emissiun A Bon entendeur dad RTS. «Nus n'excludain betg che nus cuntinuain cun quai en l'avegnir. Ma nus stuain ans cunvegnir (remartga da la redacziun: cun las autras interpresas da las 4 Vallées) ed introducir in sistem operativ unitar per l'entir territori - quai che meglierass en tut las experientschas cun la clientella.»
Crans-Montana: intgins schneplis e marketing
In auter lieu, in auter sistem. A Crans-Montana resta il pretsch da basa per in di d'ir cun skis durant l'entira stagiun tuttina: 89 francs per ina persuna creschida. Il lieu porscha dentant sin sia pagina d'internet in «pass dinamic».
Mintga di stat a disposiziun in tschert dumber da bigliets da skis a pretschs reducids cun fin a 25% rabat. Quants bigliets reducids datti per di? Tenor nossa retschertga tranter 167 e 584 per il «pass dinamic» per creschids per in di. Per giuvenils ed uffants munta il dumber maximal tranter 178 e 201.
Bleras pitschnas reducziuns
Sin il palpiri vesan las reducziuns ora carmalant. Per ina persuna creschida poi dar rabat fin a 20 francs per di da skis. Ma insumma betg tut ils bigliets reducids èn uschè favuraivels. Nossas datas mussan che mo in fitg pitschen dumber d'offertas cumpiglia gronds rabats. Per creschids porschan mo 2 fin 13 cartas dal di il pretsch il pli bass. La gronda maioritad da las cartas dal di reducidas èn reducidas mo per paucs francs, sco quai che las graficas qua sut mussan. Per survegnir ils megliers pretschs vala mo ina regla: Tgi che vegn sco emprim, mulscha l'entschatta.
Pertge sa triplescha il dumber da bigliets reducids d'in di a l'auter? Da las datas na pon ins deducir nagina logica evidenta, e las pendicularas da Crans-Montana n'han betg vulì respunder a nossas dumondas davart lur politica da pretschs. Saja sco ch'i veglia: Ils pretschs dal di paran, sco a Verbier, dad esser vegnids fixads a l'entschatta da la stagiun. Nus n'avain constatà naginas midadas tranter il november ed il schaner. Il pretsch s'augmenta mo, sch'ina categoria da bigliets è vendida ora.
La finala n'è l'algoritmus duvrà, sco er a Verbier, betg uschè raffinà sco quai ch'ins pudess s'imaginar. Il meglier cas sa basa el sin las cifras da vendita dals onns precedents. Ma ils pretschs na sa midan betg permanentamain e na vegnan betg fixads dependent da l' aura.
Pretschs betg dinamics sco argument da reclama
Il model na chatta betg sustegn unanim. Tscherts territoris da skis han gia puspè bandunà els suenter intgins onns d'experimentar, sco per exempel il territori da skis dad Andermatt (UR). «Nus avain constatà ch'ils rabats ston vegnir cumpensads. Quai dischavantagescha tuts ed è intransparent», ha declerà Pascal Schär, il manader da marketing dad Andermatt-Sedrun-Mustér en connex cun la nova orientaziun strategica da la destinaziun il 2024. Oz fa il territori da skis reclama cun ses pretschs betg dinamics. «Tar nus savais adina precis, quant ch'il pass dal di custa», hai num sin la pagina d'internet.