Siglir tar il cuntegn
Inhalt

Svizra Digitalisaziun: fundaziun pretenda dapli segirtad sociala

Pervi da la digitalisaziun dovri ina refurma tar la segirtad sociala, quai pretenda la fabrica da reflexiun Fondation CH2048. Ina gruppa d'auturs ha preschentà in studi cun tschintg ideas da refurma per la segirtad sociala.

dus mauns tegnan rucla - il mund - cun in code.
Legenda: Ina refurma da la segirtad sociala. La fabrica da reflexiun CH2048 fa propostas per il temp digital. Pixabay

En il temp da digitalisaziun, nua ch'i dettia adina dapli furmas da gudagnar daners, dovri tenor in studi refurmas. Concret proponan ils auturs dal studi dapli pajaments posteriurs tar largias en la AVS, in obligatori da cassa da pensiun per interprendiders independents ed ina segirada da principi cunter malsogna, accident da lavur e dischoccupaziun.

Il studi propona er soluziuns per stuppar las rusnas da finanziaziun tar las segiradas socialas. Tenor ils auturs pudessan ins far quai entras entradas da taglia supplementaras. Uschia duajan purschiders da plattafurmas online vegnir obligads a partir d'ina tscherta grondezza d'avair in domicil da fatschenta en Svizra.

La Fondation CH2048 ch'è vegnida fundada avant quatter onns, sa cumpona surtut da fatschentas e persunas ord l'economia e la politica. Ella vul avair in pled en capitel en la politica svizra.

RR novitads 12:00