Siglir tar il cuntegn

Header

audio
Ils dis dal cedel da pajament pon ins quintar
Or da Actualitad dals 24.09.2022.
laschar ir. Durada: 3 minutas 8 Secundas.
cuntegn

Digitalisaziun Mo pli cedels da pajament cun code QR

Davent dal prim d'october na datti nagins cedels da pajament oranschs e cotschens pli. Els vegnan remplazzads dals cedels alvs cun code QR. Tge che quai munta per nus tuts avain nus dumandà la cussegliadra da clientella da la Banca Raiffeisen Surselva Flavia Schaniel.

Ils novs cedels da pajament cun code QR duain levgiar l'entir sistem da pajament, ed impedir sbagls che pon capitar cun tschiffar las indicaziuns dal quint. Dapi la stad 2020, cura ch’ils emprims èn vegnids squitschads, vesan ins adina daplirs dad els. E dapi lura èsi era vegnì fatg attent la glieud sin quella midada – cun brevs ed era en l'e-banking. Tuttina saja quai cunzunt las persunas pli veglias che dovran nagin e-banking mintgatant stadas surdumandadas.

Ellas temevan ch'i na saja betg pli pussibel da pajar ils quints sur la banca u la posta. Ma quai è vinavant pussibel.
Autur: Flavia Schaniel cussegliadra da clientella tar banca Raiffeisen Surselva

Quels che pajan sez ils quints han duas pussaivladads:

  • Sch'els pajan ils quints per exempel sur il laptop u in tablet, lura pon els installar la app da scannar sin il telefonin. Tar la Raiffeisen ha quella num «Mobile scan». Scannar il code QR ed uschia vegnan las infurmaziuns dal pajament directamain transferidas sin il laptop u tablet – e lura è il pajament pront.
  • Quels che pajan ils quints directamain sur la app dad e-banking sin il telefonin na ston betg installar ina app separada. Els pon directamain scannar il code QR davent da l'applicaziun.

Impurtant è tenor Flavia Schaniel dentant ch'ins controlleschia anc las indicaziuns dal pajament avant che dar liber el. Quellas duas variantas funcziunan, sch'ins ha il quint sin palpiri. Tge dentant sch'ins retschaiva ils quints be pli electronicamain – per exempel per mail? Per lez cas na datti enfin ussa nagina pussaivladad da scannar il code QR.

Lura ston ins vinavant tschiffar il pajament cun il numer dad IBAN.
Autur: Flavia Schaniel cussegliadra da clientella tar banca Raiffeisen Surselva

Tschiffar da nov ston ins era las ordras permanentas – almain sch'ins ha tschiffà lezzas cun in numer da posta. Lura ston ins actualisar las indicaziuns cun in cedel da pajament cun QR. Sch'ins ha dentant tschiffà l'ordra permanenta cun il numer d'IBAN, lura na ston ins far nagut. E per tgi ch'è malsegir: L’e-banking inditgescha, tge ordras che ston vegnir actualisadas e tgeninas betg. Bler temp n'han ins dentant betg pli da far quai. Ils quints e las ordras permanentas che n'èn betg vegnidas tschiffadas da nov enfin il prim d'october, vegnan stizzadas ed uschia era betg pli pajadas.

RTR actualitad 06:00

Artitgels legids il pli savens