Svizras e Svizzers stiman bain la purschida digitala dal stadi, giavischan però che la segirezza digitala survegnia dapli schlantsch ed engaschi. A questa conclusiun vegn la retschertga che l'associaziun d'interpresas digitalas Swico ha fatg en collavuraziun cun l'institut da perscrutaziun Sotomo.
Il facit: Puncto digitalisaziun na resguardia il stadi betg ils basegns principals da la populaziun. Bain giavischia e stimia la populaziun purschidas sco spurtegls online u da pudair votar a moda electronica. La segirtad en la rait saja però pli impurtanta, han ditg stgars 80% da las persunas dumandadas.
Spurtegls èn buns – Ins vul però dapli segirtad
Tenor la retschertga giavischa la populaziun da priorisar las tematicas da cyber-segirtad, cumbat da violenza digitala e furmaziun. La pandemia haja bain catalisà il svilup e diever da la tecnologia digitala, però para betg en ils secturs giavischads. Quai hajan mussà las discussiuns per exempel da trametter las cifras dad infecziuns anc via fax ubain era la coordinaziun betg adina ideala da las administraziuns chantunalas e la federala.
Malas notas per administraziuns e scolas
Entant che las persunas dumandadas attribueschan buna cumpetenza sociala a firmas privatas, vesa quai ora cuntrari tar l'administraziun federala e tar las scolas. Mo 45% dals dumandads èn da l'opiniun che scolaras e scolars vegnian preparads avunda per las professiuns da l'avegnir. Ed ina maioritad da geniturs dumandads dattan notas insufficientas a scolastas e scolasts puncto savid digitala.