Avant in onn è l'app «Clubhouse» vegnida lantschada en ils Stadis Unids. Las davosas emnas a l'unda da hype tschiffà parts da l'Europa. Ina raschun è che bainenqual persuna prominenta dovra quest'applicaziun – cun discurrer cun la glieud che fa part dal chat.
«Clubhouse» è in'app cun las funcziuns da social media. Ella sa basa sin audio – e betg sin maletgs u videos. Il princip è simpel, i dat differentas gruppas da discussiun ed ins po sa participar activ u mo passiv.
L'access è limità
Esser da la partida sin «Clubhouse» n'è betg uschè simpel. L'app datti il mument sulet per apparats da Apple, cun Android na va anc nagut.
Tar l'appstore da Apple pon ins chargiar giu l'app, e lura sa registrar. Per propi pudair prender part, dovri dentant ina invitaziun d'insatgi ch'è gia sin la plattafurma. E mintga utilisader po mo envidar duas persunas.
Co las gruppas funcziunan
Mintgin sa entschaiver ina gruppa da discussiun tar «Clubhouse». Sur da tge ch'i vegn discutà è liber – da la cultura e musica fin a l'economia. En las gruppas datti trais differentas rollas:
- Ils moderaturs: Els mainan la discussiun, e laschan vegnir a pled persunas en ina runda da discussiun.
- Ils pledaders: Els discurran activamain en la runda da discussiun.
- Ils auditurs: Quels pon tadlar ina discussiun, quasi sco da tadlar in podcast. Cun in nuv pon els s'annunziar – e prender part a la discussiun.
Dasper las gruppas da discussiun datti era gruppas d'interess, sco tar Facebook.
Il hype pervi da «Clubhouse»
«Clubhouse» exista davent dal mars dal 2020. Ed en ils Stadis Unids han persunas prominentas procurà – che l'app è vegnida adina pli enconuschenta. E cunquai che mintga persuna sa mo envidar duas persunas, regia in tschert sentiment d'exclusivitad. E mintgin vul esser da la partida, na vul betg manchentar insatge.
Uschia èn ils plazs en «Clubhouse» tschertgads. Ed ils responsabels desistan per il mument d'avrir pli fetg l'app. Ella duai l'emprim vegnir meglra avant ch'ina gronda massa po sa participar.
Era questa app ha sias maclas
In dals problems, sco tar autras plattafurmas da social media, è il «hatespeech» – pia il parmalar e mulestar persunas. Perquai registreschan ils responsabels da l'app ils discurs, e quai na plascha betg a tut ils utilisaders.
In ulteriur punct negativ è che «Clubhouse» vul l'access als contacts da l'utilisader, quai per trametter invitaziuns.