Cun dar troccas e tennis stoppian ins savair co ch’il partenari gioghia – tge chartas ch’el dettia u nua ch’el plazzeschia la balla, di il diplomat oriund da Falera d’ina famiglia dad indesch uffants. Negoziar ina cunvegna internaziunala haja insatge dad omadus gieus.
Da preschent na sa anc nagin sch’i dat in Brexit cun u senza deal tranter l’Uniun europeica (UE) e la Gronda Britannia. La Svizra è dentant semtgada: La Confederaziun ha pront in’entira retscha da cunvegnas – da commerzi, traffic, circulaziun da persunas etc. – che entran en vigur suenter il Brexit.
Svizra ha gì bunas chartas
La cunvegna da commerzi è ina da las principalas. Lezza ha l’ambassadur da Falera negozià. L’economia svizra exportescha rauba da passa 8 milliardas francs en la Gronda Britannia. Da preschent valan per quests exports las cunvegnas che la Svizra ha cun l’UE. La Svizra haja gì bunas cartas en questas negoziaziuns, di l’ambassadur.
La Svizra ha diplomats ch’èn disads da negoziar, ils Englais n’han betg quai.
Banchier ed ambassadur
Dapi che las negoziaziuns èn terminadas lavura Winzap sco ambassadur tar la Banca europeica da reconstrucziun e svilup (EBRD) cun sedia a Londra. El represchenta là betg mo la Svizra, mabain era il Liechtenstein ed ils interess da tschintg ulteriurs pajais.
Questa banca da svilup han fundà 40 stadis dal vest suenter il sgurdin da l’Uniun sovietica. La finamira: gidar ils anteriurs pajais da l’ost da dumagnar la transfurmaziun dal sistem sovietic tar l’economia dal martgà liber.
La banca da svilup dettia credits per projects nua che bancas privatas na ristgassan betg persulas da procurar ina finanziaziun, explitgescha Winzap. Sco exempel numna el la sanaziun da la pli gronda deponia da rument en l’Europa che sa chatta a Belgrad – «ina bumba ecologica» sch’ins n’interprendia nagut.
Cumpareglià cun la Banca mundiala saja la EBRD plitost pitschna ed investeschia mo en 38 pajais. Ella na sa concentreschia betg mo sin il svilup, mabain lavuria plitost tenor criteris d’ina banca.
Nus n’investain betg mo noss daners, mabain mobilisain era daners da bancas privatas.
RR actualitad 11:00