La SRG SSR, la Societad Svizra da Radio e Televisiun dovra ina nova directura generala u in nov directur general. Gilles Marchand ch'è dapi il 2017 en uffizi sa retira anticipadamain tenor ina communicaziun. Cura percis n'è però anc betg cler. Sin il pli tard l'entschatta dal 2025 veglia la SRG SSR, tar la quala er RTR tutga, engaschar ina successura u in successur, hai num vinvant.
La raschun per la midada anticipada sajan las sfidas che spetgan. Vegniss la SRG SSR a spetgar fin tar la pensiun da Marchand l'entschatta 2027 crudass la tschertga da sia successiun entamez la perioda da votaziun enturn l'iniziativa da 200 francs bastan, davart la quala il pievel duai decider l’onn 2026. Vitiers vegnan era las tractativas davart novas concessiuns l’onn 2027 e lur conclus per l’onn 2028. Durant questa lunga perioda stoppia la SRG SSR pudair quintar cun ina direcziun generala stabila ed orientada a lunga vista, hai gì num vinavant.
Dapi il 2017 directur general
Marchand è stà dapi il 2017 directur general da la SRG SSR. El avess terminà ses temp d’uffizi cun cuntanscher la vegliadetgna da pensiun il cumenzament da l’onn 2027 en la vegliadetgna da 65 onns. La plazza dal directur general vegnia scritta ora svelt. Il process vegn manà da la cumissiun da persunal dal cussegl d'administraziun sut il presidi da Jean-Michel Cina.
