La situaziun dals uffants e giuvenils e lur famiglias è uss mendra che avant la pandemia, uschia valitescha la glieud dal fatg da la Conferenza da las directuras e dals directurs chantunals dals affars socials la situaziun. Impurtant saja perquai ch’ils posts da consultaziun per uffants e giuvenils hajan avunda persunal envers quel ch'els possian sa drizzar.
Participà a la retschertga han sper la glieud responsabla dals chantuns passa 130 organisaziuns per agid d’uffants e giuvenils da 20 chantuns. En pli han 10 organisaziuns naziunalas prendì part a la retschertga.
Nagin caracter scientific
La retschertga, che sa basa sin negina metoda scientifica, n'è betg represchentativa. Ella ha sulettamain intercurrì la percepziun subjectiva dals pertutgads. Finamira era da stgaffir in maletg general da la situaziun actuala.
Il pli grond basegn d'agir datti tenor la retschertga tar problems psichics. Quai na fa però betg surstar, datti gia in temp memia pauc purschidas per problems psichics, er tar giuvenils. Questa problematica saja sa pegiurada durant la pandemia.
Sfida per il svilup
La retschertga haja plinavant mussà che la pandemia e cunzunt las mesiras per far frunt a quella hajan ina gronda influenza sin quellas purschidas - ch'èn fitg impurtantas per il svilup persunal dad uffants e giuvenils. Uschia è per exempel vegnì numnà il contact interpersunal tranter ils giuvenils - quella haja patì entras restricziuns tar purschidas dal temp liber, sport u cultura.
Tenor la retschertga han posts da cussegliaziun ed agid per giuventetgna inditgà ch'els hajan bler dapli dumondas – i dettia dapli cas d'urgenza, dapli novs cas e dapli dumondas en general.
