Siglir tar il cuntegn

Header

Guardiacunfins e requirents d'asil.
Legenda: Il corp da guardias da cunfin duai vegnir rinforzà marcantamain al cunfin da l'ost e dal nord da la Svizra. Keystone
cuntegn

Svizra Directurs chantunals pretendan mesiras sin il sectur d’asil

En ina brev a la cussegliera federala Simonetta Sommaruga pretenda la conferenza dals directurs chantunals da giustia e polizia da la Sivzra orientala mesiras sin il sectur d’asil.

Cunquai ch’i saja danovamain da quintar cun 40’000 dumondas d’asil quest onn, stoppia la Confederaziun reagir, scriva la conferenza dals directurs chantunals.

Accelerar las proceduras d'asil

Per reducir il temp en ils centers d’accoglientscha e da transit stoppian las proceduras d’asil vegnir acceleradas cleramain. Plinavant stoppia vegnir decis pli spert davart extradiziuns da requirents d’asil.

Impedir ina migraziun nuncontrollada

La conferenza dals directurs chantunals pretenda plinavant che la Confederaziun s’engaschia per che tut ils requirents d’asil en il territori da Schengen vegnian registrads. En mintga cas stoppia vegnir impedì ina migraziun nuncontrollada. La Confederaziun stoppia far ina planisaziun per situaziuns d’urgenza e communitgar quella als chantuns.

Guardias da cunfin duain vegnir rinforzadas

Per mantegnair la segirezza pretenda la conferenza vinavant ch’il corp da guardias da cunfin vegnia rinforzà marcantamain al cunfin da l’ost e dal nord da la Svizra e ch’il servetsch d’infurmaziun da la Confederaziun vegnia augmentà.

Pretensiuns sa cuvran cun las finamiras dal Cussegl federal

Il Departament federal da giustia e polizia ha confirmà ch’els hajan retschet la brev. Guido Balmer, il pledader dal departament, ha ditg ch’els vegnian natiralmain a dar resposta als chantuns. Sin l’emprim’egliada sa cuvrian las pretensiuns dals directurs chantunals dentant cun las finamiras da la politica d’asil dal Cussegl federal. Ins possia perquai era interpretar la brev sco signal da sustegn per la revisiun d’asil davart la quala las Svizras ed ils Svizzers han da decider quest zercladur.

RR novitads 11:00

cdm/cs

Artitgels legì il pli savens

Nach links scrollen Nach rechts scrollen