En il Grischun èn 1’160 persunas stadas senza lavur il december. Quai èn bun 90 damain ch’anc il november. La quota da dischoccupaziun munta ad 1,1%, scriva l'Uffizi per industria, mastergn e lavur dal Grischun.
La reducziun minima saja da contribuir a la fin da la stagiun da construcziun ed al cumenzament da la stagiun d’enviern en il turissem. L'industria da construcziun ha gì ils pli blers dischoccupads cun 439 persunas dischoccupadas,
Ulteriuras 897 persunas fan part a mesiras d'occupaziun e scolaziun u che dovran servetschs dals centers regiunal per intermediaziun da lavur (RAV) per chattar lavur, ma na retschaivan betg sustegn finanzial. Ellas valan sco persunas en tschertga da lavur betg dischoccupadas.
Dapli dischoccupaziun en Svizra
En l’entira Svizra è il dumber da dischoccupads percunter s’augmentà per passa tschintg milli sin 96'941. Quai correspunda ad ina quota da dischoccupaziun da 2,1%.
Il december han passa 60 manaschis survegnì indemnisaziuns per lavur reducida en il Grischun. Cumpareglià cun il mais avant è quest dumber sa reducì per la mesadad.
Dischoccupaziun en la zona d'euro resta bassa
La dischoccupaziun en ils pajais da l'euro resta sin in nivel da record bass. Il november era quella tar 6,5% ed uschia uschè bassa sco l'october, communitgescha l'uffizi da statistica Eurostat. Dapi l'introducziun da l'euro n'è la quota da dischoccupzaiun anc mai stada uschè bassa.
Cumpareglià cun il november avant in onn è quella ida enavos per 0,6%. Dals 20 pajais ch'han l'euro han la Spagna e la Grezia la pli auta quota da dischoccupziun cun 12 respectiv 11% e la pli bassa ha la Germania cun 3%.