Legenda:
Anc bundant 40 onns suenter che la lescha d'egualitad è ida en vigur, èn las pajas da dunnas en media 1'500 francs pli bassas sco quellas dals umens.
Keystone
cuntegn
Discriminaziun da paja - Glista naira u alva: Travail.Suisse lantscha plattafurma
Ina nova plattafurma duai gidar a cumbatter l’inegualitad da paja tranter Svizras e Svizzers.
La plattafurma d’internet www.RESPECT8-3.ch ha il sindicat Travail.Suisse lantschà il mardi ensemen cun sindicats affiliads.
Davent dal 1. da fanadur va en vigur la revisiun da la lescha d’egualitad. Uschia ston firmas cun dapli che 100 collavuraturas e collavuraturs analisar las pajas sin inegualitad.
Questa plattafurma duess animar firmas da far l’analisa il pli svelt pussibel. Ed era firmas cun damain che 100 collavuraturas e collavuraturs duain sa participar e far l’analisa. Firmas cun exempel positiv arrivan lura sin ina glista alva. Ina glista naira duai suandar pli tard. Là vegnan numnadas firmas che na sa tegnan betg vi dal reglament.
En media èn las pajas da las dunnas 1'500 francs pli bassas che quellas dals umens. La differenza na sa lascha almain per part betg declerar cleramain. Vul dir cun scolaziun, experientscha nu branscha, sco Travail.Suisse scriva. Uschia è la discriminaziun da paja tar 7'700 francs l'onn – ch'ina dunna gudogna pli pauc per la medema lavur cun las medemas qualificaziuns.
Revisiun da la lescha d'egualitad
Avrir la boxSerrar la box
Las firmas grondas en Svizra han davent dal 1. da fanadur in onn temp per far in'analisa da las pajas. Quai aveva decidì il parlament a Berna per far frunt a la discriminaziun da paja tranter dunnas ed umens. Ils resultats da las analisas ston las firmas communitgar a collavuraturas e collavuraturs. Sch'i dat ina discriminaziun sto l'analisa vegnir fatga aifer quatter onns anc ina giada. Dentant na prevesa la lescha naginas sancziun per firmas.
Dapli che 100 collavuraturas e collavuraturs han en Svizra mo 0.9% da las firmas. Dentant occupan questas firmas grondas 49% da tut las emploiadas ed ils emploiads.
