La Svizra saja en in bun stan, cunzunt cumpareglià cun ils pajais da l’exteriur, di Ueli Maurer en il discurs cun RTR. La Svizra ensemen cun sias valurs saja in’ierta a la quala la populaziun svizra stoppia avair quità. L’incumbensa da mintgina e mintgin saja da dar vinavant quell’ierta. L’istorgia mussia che gist ils onns cura ch’i giaja bain sajan privlus, che las valurs vegnian mess en dumonda ni ch'ellas vegnan perfin dadas si. L’emprim d’avust saja in bun di da sa regurdar da quai.
Politica sto prender serius quitads
Bleras persunas en Svizra fetschian quitads pervia da la situaziun finanziala. En ses inscunters cun la populaziun raquintian els da las premias autas da la cassa da malsauns ni ils tschains da locaziun auts. Mo era la criminalitad e la surimmigraziun fatschentian la glieud. Impurtant saja da prender serius quellas temas, da tadlar e dad esser datiers da la populaziun e da far quai ch’ins di. Il president da la Confederaziun è persvas che la politica pateschia dad ina mancanza da credibladad perquai ch’ella empermettia bler mo fetschia suenter nagut.
Igl è bainduras stentus da persequitar ils detagls, da tschertgar meglras schliaziuns e da restar stinà. Mo gist uschia possia la politica puspè gudagnar confidenza,
Impurtant saja era da betg emblidar las regiuns periferas da la Svizra. Quellas sajan ina part da l’identitad da noss pajais. El haja fitg grond respect da la populaziun che vivia e tegnia la dira en quellas regiuns. Là dettia pli paucas schanzas da scolaziun per ils uffants. I dovria perquai buna infrastructura e plazzas da lavur. Mo sche nus laschain participar era quellas regiuns existia la Svizra era vinavant en quella qualitad. El sez saja era in da la regiun rurala e perquai haja el era fitg gugent quellas regiuns.
Mantegnair ina Svizra quadrilingua
El observi ch’il chantun Grischun saja conscients da la muntada dal rumantsch e tgiria era quel.
La Svizra è in pajais cun quatter linguas naziunalas e nus stuain far tut il pussaivel per ch’il rumantsch sappia era viver vinavant.
El e sia famiglia hajan fatg savens vacanzas en il Grischun ed hajan era vuli emprender rumantsch. Mo a Turitg haja dà mo mintga dus onns in curs. Chinais e russ sappian ins cumenzar x giadas. Quai mussia era ch’ins stoppia avair quità da las minoritads. Quai custi forsa insatge mo i rendia.
A la Svizra giavischa il cusseglier federal Ueli Maurer segirtad, bainstanza, independenza, libertad e da pudair decider sezza davart ses futur. La Svizra haja ina gronda schanza. Mo ins stoppia era esser conscients che nagut vegn schenghegià. Quai che nus hajan oz saja sco in’ierta. E quella stoppian nus meglierar e dar vinavant. Quai saja la sfida principala.
RR actualitad 11:00